ديليمي، داليمدان چيخارتسالاردا،
قوي قارداش درديمي دئييم باري بيل
گونئي دن– قوزئيه، غربدن– شرقه.
هانسي خالقي گؤردون بيزيم تك ذليل؟
دئميرم دونيادا اسارت يوخدور
چوخ يئره سونگو تاخميش استعمار،
آنجاق بيزيم كيمي اَزيلن آزدير،
هاردا حاق وئرمز وار حاق تاپيلماز وار!
ميللي آزادليقلار عصري اولسادا
هر يئرده، هر ياندا آدي بو عصرين
نه ائتمك «دونياني بوغدا توتسادا،
كهليين روزيسي چينقيلدير» همين
بو شرف، بو شوكت، بو قدرت، بو شان
هاردا دوغورداندا بيزه عار اولسون!
حياتين آمانسيز بير قانونو وار،
تعصوب سيز ميلت گرك خوار اولسون.
ميللي تعصوب دن دانيشديم اولسون
اصليني ايتيرنده حارامزاده دير،
مرد اوغول وطنين حاققين ايتيرمز،
وطن اينسانا اَن بؤيوك آنادير.
قويون محكوم اولوم ميلت چي ليگه،
دونيادا ميليتين سئومه ين كيمدير؟!
ديلين، ائلين يوردون تالان ائتسه لر
آجييب باشينا دؤيمه ين كيمدير؟!
گرك گؤزلريندن گؤز اؤرته هر كس
قارغا يوواسينا ياناشسا اگر،
نييه وطنيمي سئومه ييم نييه؟
من قارغادان دا اسگييم مگر؟
من دئميرم اوستون نژاددانام من
دئميره م ائللريم ائللردن باشدي
منيم مسلكيمده منيم يولومدا،
ميلت لر هاميسي دوستدور، قارداشدير.
چاپماق ايسته ميره م من هئچ ميلتين،
نه ديلين نه يئرين نه ده امه يين
تحقير ائتمه ييرم، هده له ميره م
كئچميشين، اينديسين، يا گله جه يين
من آييرما ييرام آيري سالميرام،
قارداشي، قارداشدان، آروادي اَردن
آناني بالادان، اَتي ديرناقدان،
اوره يي اوره كدن، قانادي پردن
پوزماق ايسته ميره م من بيرليك لري
اينسانليق بير ليگي ايده آليمدير،
قارداشليق يولداشليق ابدي باريش
دونيادا اَن بؤيوك آرزولاريمدير.
آنجاق بير سؤزوم وار: من ده اينسانام
ديليم وار، خالقيم وار، يوردوم يووام وار،
يئردن چيخماميشام گؤبه لك كيمي
آدامام حاققيم وار ائليم اوبام وار
قول يارانماميشام ياراناندا من
هئچ كسه اولمارام نه قول نه اسير
قورتولوش عصري دي اينسانا بو عصر
اسير اولانلارين بوخووون كسير.
بولود قارا چورلو(سهند)
بیرعده سئوه ر جهاندا سئیر چمنی