استادبارز/یارب قوجالتما...

 

 

سوزگون باخيشلار آلدي اليمدن توانيمي

كيپريك اوخ اولدو، دگدي ديله تؤكدو قانيمي

سنسيز ياناردي عشق اودونا قان اولان كؤنول

سالدين بلاي هجره اوجالتدين فغانيمي

اي كاش او ناز و غمزه سي جانيم آلان گؤزون

بير گون بيليدي ديلده كي سوز نهانيمي

آزاده شاعرم دئييلم باغلي بير يئره

من اؤز ديليمله خلقه يئتيررم بيانيمي

كسگين قلم له فكرين اگر اولسا سازشي

قويماز زمانه محو ائده نام و نشانيمي

من بير گول هميشه بهارم بو عصرده

ياز گؤرموشم عؤمور بويو فصل خزانيمي

عشقين متاع محنتي جان نقدينه ساتير

نفعي ضرر حساب ائله باغلا دكانيمي

عاشق قوجالسا سئوگيسي گؤزدن سالار اونو

يا رب قوجالتما " بارز " شيرين زبانيمي.

 

استاد بارز

استاد بارز/روحون معراجى

 

دوغرو عاشق‏سن اگر معشوق بى‏همتانى سئـو

صورته توولانما چوخ باخ لفظينه معنانــى سئـو

پرده عصمت‏ده بسلنميش نگاره وئـر كــؤنــول

عشقوى پاك ائت‏گيلن نه هر گوزى شهلانى سئو

اول نه بير مجنون كى سالسين چؤللره ليلا سنى

اول نه بير وامق كى نفسه توولانيب عذرانى سئو

سوداسيز باش، بير آغير يوك دير بدنده عاشقه

ال گؤتور باشدان هميشه باشدا كى سودانى سئو

دنيانين هر زادى فانى دير گئدر قــالمــاز يقيــن

دولت جاويـده مــايلسن اگــر عقبــانــى سئــو

حققى آختار تاپ حقيقت مولكونون سلطانى اول

تاج عزت باشه قويماق ايسته‏سن مـولانــى سئـــو

هر ايكى دنياده عــزت ديــر علــى نــوكــرليگــى

گئت غلام شــاه مــردان اول شــه والانـــى سئــو

ايسته‏سن علمين چوخالسين سعى ائله(قرآن)اوخى

ايسته‏سن عشقين صافالسين جهد قيل طاهانى سئو

قهــرمــانليــق درسى وئردى حق سئون انسانلارا

سئومه‏لى گونلر ايچينــده روز عاشــورانــى سئــو

سرو تك آزاده اول چك قيــر تعلــق رشتــه‏سيــن

هر نه وار آت خاطريندن شــاهــد يكتــانــى سئــو

حظ نفس اولماز هوسدن، روح ايچون بير زاد قازان

قطره‏دن ال چك سئويرسن اى كؤنول دريانى سئــو

اينجه‏ليك‏لر چوخدى عالمــده ساييلماز بيـر بـه بيـر

هر بنا گؤرديكجــه سيــر ائت دقتــه بنــانــى سئــو

سنــده بيــر معـراج روح ائيلــه ياخينــلاش مقصده

حد قوسينه چاتاندا قرب او عــدنــانــى سئــو

آت عصانى اژدها اولسون اساس سحرى پوز

طور اخلاصه سفر قيل اورداكى موسانى سئـو

«بارز»ا درويش عشق اول نيليسن سيم و زرى

سال اودا ياندير هواى نفســى، استغنــانى سئو

 

استاد بارز

استادبارز/گئجه لر

 

 

تنگ اولور باشیما تک لیک ساری، عالم گئجه لر

 

بیر نفر اولمادی منله اولا همدم گئجه لر

 

عشقه بیگانه اولانلار نه بیلیر کیم نه چکیر

 

چکمه سین من چکنی اهل جهنم گئجه لر

 

بیر منم _ بیر بو قلم ، بیرده بو ویرانه کونول

 

... اوچوموزده گلیریک ناله یه باهم گئجه لر

 

کیمسه بیلمز اورگیم سیررینی دونیادا منیم

 

یاز قلم دورما کی سنسن منه محرم گئجه لر

 

یارالی کونلومه کوندور وورولان یاره لره

 

مهربان یار الی ایستر قویا مرهم گئجه لر

 

نه وئرر گوندوزو مهلت منه هیجران ستمی

 

نه قویار باش یئره بیر لحظه قویام غم گئجه لر

 

عشقینه صادق اولان جهدیله همت کمرین

 

درد و غم چکمه یه باغلار بئله محکم گئجه لر

 

منده مجنون کیمی زنجیریده گوررم اوزومو

 

اوندا کی زولفون اولار گوزده مجسم گئجه لر

 

من چکن غم یوکونو بیر گئجه چرخین بئلینه

 

قویسالار، پشت فلک غمدن اولار خم گئجه لر

 

پرده لی قویدو سوزون "بارز"ه فاش ائیله مه دی

 

سرَلر اورتویو بو قورخولو مبهم گئجه لر