حسين نجفي(شادي)/ گوزل

 

 

شیشه مئیدن کئفله-نیبدیر  بیزده کئفلنسک گوزل

قومرو باغدا  دیلله-نیبدیر  بیزده دیللنسک گوزل

غم تیکانین سینه ده  کوکلنمه-میش  چکمک گرک

چول-باییر  گوی گلله-نیبدیر  بیزده گوللنسک گوزل

غنچه نی  گولدورمک ایستیر  بو لطیف یئل کی اسیر

باغدا گوللر  یئلله-نیبدیر  بیزده یئللنسک گوزل

ال وئریب بادصبا نظم ائتمه-یه  سونبول تئلین

گول بوداق کاکلله-نیبدیر  بیزده تئللنسک گوزل

بلله نیب  اونلارکی بیلمزدیک هله احواللارین

چوخلو زادلار  بیلله-نیبدیر بیزده بیللنسک گوزل

شادیا  آچدیر  بهاری سینه-ده  قیش اولسادا

یاز گولوبکن  گوللـه-نیبدیر  بیزده گوللنسک گوزل

 

حسين نجفي(شادي)

حسين نجفي(شادي)/جانان آراسیندا

 

کونلوم چابالیر کفرایله ایمان آراسیندا

آواره دوشوب عدن ایله  نیران آراسیندا

عقلیم اوزو  شیطاندی سالیب جنگی جدالی

صلح ائتمز  اولان عشقیله ایمان آراسیندا

تئللردی چکن داره  دابانه یئتیشیب کن

جانیمدی چیخان  دردایله درمان آراسیندا

بو غنچه دوداقدان نئجه کئچسین دلی کونلوم

آیدین سو ایچر چاه زنخدان آراسیندا

مست اولماغی اویرتدی منه نرگس مستی

اویناتدی نئجه گور منی مستان آراسیندا

زاهد نه بیلیر گول ندی گولشن ندیر آنجاق

ساخلانمیش او خام ظلمت زندان آراسیندا

اسلامدی بیزیم دینیمیز آمما بو حقیقت

گیزیلینده قالیب بوللو مسلمان آراسیندا

انسان اولان آزاد یارانیبدیر  اونو بیلسه

حبس ائتمز اوزون بیر نئچه عنوان آراسیندا

طوفان دئدیگین آز-چوخ اولار  جوده لیکن

انساندی قالیب  یوز دلی طوفان آراسیندا

"شادی" بو آز  عومرون نئجه سووسون اونا اویرت

مستانه دوشه یاخشی دی  یاران آراسیندا

 

حسين نجفي(شادي)

 

 

 

حسين نجفي(شادي)/ایری قاشلار

 

دردیمین درمانی یوخدور آتمیشام درمانیمی

گونده یوز دفعه توکورلر ماه رولار قانیمی

سویله کی زحمت ندن سن  چوخ چکیرسن ای طبیب

لحظه-لحظه بوقارا گوزلر آلیرلار جانیمی

من دونن تانریله بحث ائتدیم بونه خلقتدی کی

منده بیر جان خلق ائدیب مین ائتمیسن جانانیمی

سویله دی  ای عشقلی جانانه لر جانانه سی

ایندی تاپدیم من فضول آختاردیغیم شیطانیمی

گئتمیسیز سیز دوز یولا  اول آدام و حوا کیمی

من تانیردیم  تانرییام خلق ائتدیگیم انسانیمی

سویله دیم  سن ائتدیگین خلقت منی کئفلندیریر

گر فضوللوق ائیله سم  عفو ایله بو عنوانیمی

وئر اجازه بیرده من یاد ائیله ئیم  جانانه نی

آلمیسان روز ازلده عشق اوچون پیمانیمی

اینجه بئللی بیرقارا تئللی آغ اوزلو گورسه گوز

سینه ده  تنگ ائیله ییر  کونلوم منیم میدانیمی

بیر هنرلی عشوه لی  آنلاقی دلبر قازدیرار

جانیمین  دورد گوشه سینده  کوک سالان ایمانیمی

باخسا بیرعارف گورر باشدان باشا جانانه دیر

نقطه-نقطه نقش ائدن خال وخط دیوانیمی

نئیله ییم یوخ الده چاره چیرپینیر  عشقین قوشو

ایری قاشلار ایزله ییرلر  بیر به بیر  سئیرانیمی

خوش دئدی ساقی کی عشقین یوللاری آزاد دئییل

"شادی" سن آزاده اول مست ائت لب خندانیمی

 

حسين نجفي(شادي)

 

حسين نجفي(شادي)/اودا دوندوم یئنه کولدن

 

یاندیقجا کول اولدوم  اودا  دوندوم یئنه کولدن

بو درسی من آلدیم کوله دونموش یانار ائلدن

بولبول کیمی افغان ائده رم  دار قفسیمده

بیر گون سیناجاقدیر  بیر اولو  یئلدن

طوفان سالارام یئل کیمی سئللر توره در کن

چوخ گوجلو اولار ائل گوجو  البته کی سئلدن

خاطیرده دومانلار توره نیبدیر  دیله گلمز

آشفته غبارلار  سالا بیلمز منی دیلدن

پیمان قویولوبدور  من ایلن  ائل آراسیندا

کئچدیکجه  زامان  تازه له نر   سوز ایلی ایلدن

تئل تئل ائده بیلمز منی دوراندا  اسن یئل

بیر ضربه-یه  یوز نغمه چیغیر گور نئجه تئلدن

یئل باغلیدی ائل یوردونا ائلسیز ندی وارلیق

چن ده  ییغیشار  گونده چیخار  بیر گون او بئلدن

گونلر سووشار  آیدا چیخار ایلده گئدرکن

باغ باغچا دولار  اییلی  عطیرلی ساری گولدن

یوسف-ده  زلیخاایله همدم اولو بیرگون

یوسف بدنی چیخدی آخان عشقلی نیلدن

"شادی" اوله-جک  عشقی ولی  اولمه-یه-جکدیر

بو رمز قالاندیر  نئجه کی  واردیر ازلدن

 

حسين نجفي(شادي)

حسين نجفي(شادي)/نئجه گئتدين؟

 

اول گون كي  منه عشق ياراتدين  نئجه گئتدين؟

آل صورتيمي اونلا ساراتدين  نئجه گئتدين؟

من بير خام آدام  سنده ده  يوخ رحم ومروت

بير باخماق ايلن  وضعيمي قاتدين  نئجه گئتدين؟

قان ياشلي بوگوزده  يوخو  يوخدور  گئجه سنسيز

بختيم كيمي منسيز گئجه گئجه ياتدين  نئجه گئتدين؟

كونلوم  چابالير هر گئجه گوندوز سني ايستير

سن داش كيمي الدن مني آتدين نئجه گئتدين؟

چيخديم بازارا  يوخلاياراق  عشق ماتاهين

بير قول كيمي سن تئز مني ساتدين نئجه گئتدين؟

گوز قالدي يولوندا يئنه "شادي" سني گوزلر

اون دورد گئجه ليك آي كيمي باتدين نئجه گئتدين؟

 

 

حسين نجفي(شادي)