علی آقاواحید/گؤزلرین

 

سئوگيليم، ائل بيلير من اهلي-دردم،

سندن باشقاسيني سئوسم نامردم

غصه دن اؤلورم نئيليم كي، هردم،

مني قويوب باخير يانا گؤزلرين.

 

كيپريگين خنجردير، قاشلارين كامان،

ييخديغين عاجيزه وئرمزسن آمان.

دئديلر جلّادسان، ائتمزديم گومان،

سالاجاقدير مني قانا گؤزلرين.

 

سنين الينده دير  هر اختياريم،

ظاليم،اؤلدور مني غمدن قورتاريم،پ

بس كيمه سؤيله ييم، كيمه يالواريم،

گتيريب دير مني جانا گؤزلرين.

 

كؤنلومو سالاجاق زولفون كمنده،

حسرتين قويماييب جان قالسين منده،

او گؤزلر وار ايكن نه قدر سنده،

آلاجاق كؤنلومو سونا گؤزلرين.

 

واحيدم ،سئوگيليم، منده قانيرام،

فتنه كار گؤزلي اوزدن تانيرام،

نئجه دئييم سنه، غمدن يانيرام،

منيم تك اود توتوب يانا گؤزلرين

 

علي آقا واحيد

علی آقاواحید/سر زولفون خیالیندان

سنيــــــنله من، گؤزليم آشـــــناليق ائيله ميشم

سني وفالي بيليـب، جـان فـداليـق ائيلـه ميشـم

رقيـــــــبه همدم اولوب ، سالمـا سن مني گؤزدن

هاچانكي گون سنه من بي وفاليق ائيله ميشم؟

سنينلـه يـار اولالـي، بيـر زمـان اوزوم گـولمـه ز

 كـي بيلميـره م سنـه، نـه بـي اداليـق ائيلـه ميشـم؟

 جفانـي تـرك ائلـه، مـه پـاره لـر جفـا ائلـه مـه ز

 نه مدت ايـدي قـاپـونـدا گـداليـق ائيلـه ميشـم

 گونـوم قـارالـدي سـرِ زولفـونـون  خيــــالينـدان

تعجبـم، سنـه نـه اوز قـاراليــق ائيلــه ميشــم

 كسيب اوميديمي ، واحيد ، من اؤز نيگاريمدان

صفالي، عيشي مي، آخـر فنـاليـق ائيلـه ميشـم

 

 علي آقاواحيد

علی آقاواحید/بیر نام آلاسان

 

سئودیگین یارین الیندن توتاسان جام آلاسان

اؤپه سن لبلرین او ناز ائده ، سن تام آلاسان

مبتلاسی اولاسان بیر گولر اوزلو گؤزه لین

هر سحر کوسدوره سن کؤنلونو ، آخشام آلاسان

شاعرانه نه سعادتلی گؤزل منظره دور

باخیب اؤز ایسته دیگین دلبره بیر کام آلاسان

شوق لعلی یئتر عشق اهلینه گول چهره لرین

نه گرک! ساقی الینده می گول فام آلاسان

یا وئریب جان وطن اوغروندا هنر گؤستره سن

یا اولوب عشق اسیری بئله بیر نام آلاسان

اووچو گؤرموش قوشی صیاد چتینلیکله توتار

ساده دل بیر ائله قوش تاپ کی، اونی رام آلاسان

بیر گؤزل وارمی کی ناز ائیله مه گیندن باشقا

یئریشیندن، دوروشوندان ، باخیب ایلهام آلاسان

بسدیر ، ای خسته کونول هیجر بلاسین چکدین

سن گرک وصله یئتیب بیر قدر آرام اولاسان

واحید! انعام ائده جک یاریم اؤز عاشیق لرینه

سن ده بیر لطفه گلیب صاحب انعام اولاسان

 

علی آقاواحید

علي آقا واحيد/سئوگيلي جان

 

بيلسن گوزليم سن نه قدر سئوگيلي جانسان

 

                      ظلم ائيله مه قوي سويله مه سينلر جان آلانسان

 

سوسدورما او گول چهره ني آلدانما رقيبه

 

                            اوز قدريني بيل كي نه قدر ايندي جاوانسان

 

اغياره اينانما گوزليم قورخورام اوندان

 

                        چوخ ساده سن هر سؤز كي ديللر اينانانسان

 

گول دن ده ، چيچك دن ده ، گونش دن ده گوزل سن

 

                           سن باغ ملاحت يئتيرن سرو روانسان

 

گؤردوم يئنه مين نازيله بيگانيه باخدين

 

                      چوخ شبهه يه سالدين مني بيلديم نيگرانسان

 

گؤر بير نه گوزل ليكده يئتيرميش سني طالع

 

                           حسرت چكر عالم سنه مشهور جهانسان

 

واحيد بو قدر سنده كي وار عشق و محبت

 

                     دونيا قوجاليب گئتسه چتين سن قوجالانسان

 

علي آقاواحيد

کویوندا دولانسام گئجه گوندوز

زولفونده نه لازیم ، گؤزلیم ، شانه دولانسین ؟

قویما او حرمخانه نی بیگانه دولانسین

عیب ایله مه ، کویوندا دولانسام گئجه گوندوز

شمعین گرک اطرافینه پروانه دولانسین

ساقی دولانیم باشینا مئی جامینی گزدیر

سرمست اولوم ، باشیما میخانه دولانسین

اول زولفه کؤنول وئرمه ، دییرلر منه ال چک

اونسوز نئجه بس بو دل دیوانه دولانسین

مجنون نه برابر منه صحرالره قاچدی

عشق اهلی اودور عرصه ده مردانه دولانسین

اغیار ایله اؤز یارینی همدم گؤرن عاشیق

دوشسون او گره ک دشت و بیابانه دولانسین

سرخوش لیق ایله عؤمرونی صرف ائیله مه  واحید

عارف اونا دییرلر کی ، حکیمانه دولانسین

ستمله قان اولان کؤنلوم

گلوبدور تنگه ای ظالم ، ستمله قان اولان کؤنلوم

همیشه باغ وصلینده ، گولوب خندان اولان کؤنلوم

دوشوب مجنون کیمی ، صحرایه بیر لیلی فراقیندا

بوتون عاشقلر ایچره ، منبع عرفان اولان کؤنلوم

نه اولدو بیلمه دیم دوشدو ، جدا گولزار کویوندان

همیشه خوان وصلین بزمینه ، مهمان اولان کؤنلوم

کیمه بیلمم ، گئدیب اظهار قیلسین محنت عشقین

دؤنوبدور قانه هيجرینده غمی پنهان اولان کؤنلوم

نه چاره ائیله سین ، بیلمم خلاص ائتسین اؤزون غمدن

اسیر محنت و پا بسته هيجران اولان کؤنلوم

اولورمی بیر زمان خرم ، یئتیشسه وصل جانانه

غم هجرینله افغانلار چکیب ، گریان اولان کؤنلوم

منم فرهاد ! عصرین سئودیگی واحيد  گوزل لر دیر

اودور کی لاله داغین گؤستریر ، ویران اولان کؤنلوم

یئتمه دیم مقصودیما

چوخ گوزللر گوردوم آختاردیم بوتون دنیانی من

تاپمادیم  عالمده اوز کونلوم سئون جانانی من

بی نوا پروانه لر تک  یئتمه دیم مقصودیما

عشق سوداسیله یاندیردیم بو شیرین جانی من

نازنین ، آهو باخیشلی چوخ پری لر گورموشم

سئو یمه دیم  ائوز سئوگیلیمدن باشقا بیر جیرانی من

بولبول نالانی یم من بیر گول اوزلی دلبرین

نیلره م هر لاله اوزلی غنچه ی خندانی من

هر گولون بیر عطری وار هر غنچه نین بیر نشئه سی

اولموشام چوخ نازنین لر باغینین باغبانی من

وار امیدیم  وصل جانانه یئتیشسین تئز الیم

آهیله سوندوررم آخر ، آتش هجرانی من

 واحیدم  بیمار عشقم ، غیردن یوخ منتیم

دردیمه جانان الیله ائیله رم درمانی من

بیر نفر اهل وفا مین بیوفادن یاخشیدر..

بیر نفر اهل وفا مین بیوفادن یاخشیدر

بیر صداقت اهلی مین اهل ریادن یاخشیدر

 هانسی گولدور حسنده سندن گوزلیدر،سوگیلیم؟

 هانسی بلبل عشقده من بینوادن یاخشیدر؟
 
 قاشلارین چرخین هلالیندن ،اوزین خورشیددن

صورتین آیینه گیتی نمادن یاخشیدر 
  
 بیرداها خالین گوزه للیک آرتیریر روخسارینه

 بیر غلط سوزدور دئمشیلر ،آغ قارادان یاخشیدر 
 
  گوزلرین صحرای چین آهولریندن دیلفریب

عنبرین گیسولرین مشک خطادن یاخشیدر
 
 صحتی بیمار ،عشقین کعبهء کوینده دیر

 اهل درده خاک راهین توتیادن یاخشیدر
 
 مین بلا طوفان قوپسا ،ذره گلمه ز عینیمه

رخنه گورمز هربنا کیم ابتدادن یاخشیدر
 
 جاهله تبلیغ عرفان ایله ملک آسان دگیل

دیدهء خفاش ایچون ظلمت ضیادن یاخشیدر
 
  واحید،انصافأ دئسین تبریز ده دوستوم اعتماد

 گنجلرده هانسی شاعر بیر یادن یاخشیدر

 

بیــــــــــر بیـــــــــر !!!

جمالین شمعینه،جانا ، یانارپروانه لر بیر بیر

چکر زنجیرِ زولفون حسرتین دیوانه‌لر بیر بیر

ائدر عشاق کؤنلون جمع ایکن آشفته هر ساعت

پریلر زولفونه دگدیگجه، ای دل، شانه‌لر بیر بیر

یئنه بیلمم نه افسون ائیله‌میش جادویِ چشمانین

که دگمیش بیر بیرینه مردم فرزانه‌لر بیر بیر

نه مئی‌دیر، گؤزلرین قوربانی، بیلمم باده‌ی عشقین

کی، ایچدیکجه تاپار هشیارلیق مستانه‌لر بیر بیر

لبین اؤپمک خیالیله دلِ ساغر اولوب پر خون

اول حسرتله گزه‌ر الدن اله پیمانه‌لر بیر بیر

دهانیندن اثر یوخدور، دئمیشلر، شرطی وار، آمما

یئتر تحقیقینه شرح ائتسه‌لر فرزانه‌لر بیر بیر

عرق درمی دوزولمش عارضِ آلیندا سر تا سر؟

گول اوزره ژاله‌دیر، یا اینکی اول دوردانه‌لر بیر بیر

مذاقِ لعلینی گؤرمشله، دئرلر جامِ مئی ایچره

شرفیاب اول جهت‌دن‌دیر اولوب میخانه‌لر بیر بیر

آییلماز جهل اهلی، واحید، هرگز خوابِ غفلتدن

مگر اهلِ ریادن ترک اولا افسانه‌لر بیر بیر

بیلمه‌یه جکسن!!!

عشقین ائیله سه عالمی قان بیلمیه جکسن

یوز دفعه دئسه‌م، مطلبی قان، بیلمه‌یه جکسن

باخ سینه مه، مین یاره ووروب تیرِ نگاهین

افسوس کی، ای قاشی کمان، بیلمه‌یه جکسن

آخر کی قوجالتدی منی، درِد و غم عشقین

پیر اولماسان، ای تازه جوان، بیلمه‌یه جکسن

بی‌مهرسن، عالمده، رُخِ آلینا حسرت

وئرسه‌م‌ده اگر هیجرده جان، بیلمه‌یه جکسن

مجنون کیمی، زنجیرِ سرِ زولفینه باغلی

اولسام داخی، رسوای جهان، بیلمه‌یه جکسن

توتسام، گؤزه‌لیم، دامنینی، اینجیمه منده‌ن

نیلیم کی، دئسم گئتمه، دایان، بیلمه‌یه جکسن

کویوندا گؤزوم یاشینی، یوز یول ستمیندن

ائتسه‌م یوزه، ای سرو روان، بیلمه‌یه جکسن

سرّ لبینی دیلده نهان ساخلادیم ائلدن

فاش اولمایا، بو رازِ نهان، بیلمه‌یه جکسن

شؤق دهنین  واحیدی  محو ائیله‌سه هر گاه

اوندان یئنه بیر نام نشان، بیلمه‌یه جکسن

عشق زنجــــــــــیری !!!

ساقیا! بیر بو ده‌گیل نشئه‌سی پیمانه میزین
هله بوندان سورادیر لذّتی میخانه میزین

بیز گرک باده‌ی گل‌گونی حکیمانه ایچک
پوزمایاق رؤنقینی مجلیسِ مستانه میزین

آیاغین اؤپمه‌لییک خادمِ میخانه‌لرین
بلکه، جام ایچره گؤره‌ک عکسینی جانانه میزین

زولف شؤقیله اولاق مست، بوتون عاقیل‌لر
قالسین ادراکینه حئیران دلِ دیوانه میزین

بیز همان رندِ خراباتیِ بی‌باک‌لریک
صحبتی ایندی‌ده دیل‌لرده‌دیر افسانه میزین

درد الیندن بوقدر چکدیگیمز ناله‌لره
نه گلیر یاریمیزن رحمی، نه بیگانه میزین

عشق زنجیرینه واحیدده گرفتار اولدو
آزدی گویا، بیری‌ده آرتدی بو دیوانه میزین

سن اولماسان، گؤزه لیم !!! ...

 سن اولماسان، گؤزه لیم، گولستانه باخمازایدیم
چمن چیچک لرینه عاشیقانـه بـاخمـاز ایـدیـم

اسیـر زولفـون ا گـر اولمـاسـایـدیـم عـالمــده
جمالینـا بـو قـدر عـاجیـزانـه بـاخمـاز ایـدیـم

منیملـه اولسـاایـدیـن بیـر دقیقـه عـؤمـرومــده
جهان بوتون گؤزه ل اولسا، جهانه باخمازایدیـم

منی فراقین اودی یاخمـاسـایـدی شمـع کیمـی
گؤرنده گول اوزونو، یانه ـ یـانـه بـاخمـازایـدیـم

فـراقینـا دؤزه بیلسـه ایـدی قـان اولان کـؤنلــوم
یولوندا چکدیگیم آه و فغانـه بـاخمـازایـدیـم

او گول جمالینا من عاشیق اولماسـایـدیـم ا گـر
فغانِ بولبوله چـوخ محـرمـانـه بـاخمـازایـدیـم

نـزاکـت اولمـاسـا، واحیـد، طبیعتیمـده منیــم
او قارا گؤزلره مـن شـاعیـرانـه بـاخمـازایـدیـم

محبت اهلینه !!!

کونول وفاسیز اولان نازلی یاره یالوارما
نه اعتبار اونا بی اعتباره یالوارما

داریخما یاخشی ، یامان روزگار یمیز گئچه جک
بو بئش گون عومره گؤره روزگاره یالوارما

سنین ده بیرگون اولار نوباهارین ای بولبول
خزان جفاسینه صبر ایله رخساره یالوارما

فقیره عاجزه مظلومه احترام ائیله
عدویه ، قان ایچه نه ظلمکاره یالوارما

وطن یولوندا اؤلوم مرد اوچون سعادت دیر
حیات اوچون فلک کج مداره یالوارما

مخالف اهلینه باش اگمه سن ده منصور اول
اناالحق اوسته چکیلسن ده داره یالوارما

محبت اهلینه "واحید" همیشه خدمت ائیله
نه تاجداره نه بیر شهریاره یالوارما

منیم چـــــــون ...

هر كس كی دئسه درديمی دلداره منيم چون

گويا كی طبيبيمدير ائديب چاره منيم چون

بير بولبولم اؤز ناله ی زاريم منه بسدير

كيم يالواراجاق گولدن اؤتور خاره منيم چون

بير لاله روخون من يئنه زولفونده اسيرم

گؤردوكده دئيير خلق گونو قاره منيم چون

جاندان كئچه رم بير ائله حال اهلی اولايدي

درديم دئييب اول دلبره يالواره منيم چون

پروانه ده اولسايدي اگر منده اولان عشق

يوز شؤق ايله چيرپاردی اؤزون ناره منيم چون

هيچ بير كسه راضی دئييلم يار يولوندا

منت چكه بوندان بئله اغياره منيم چون

باشدان باشا واحيد ، بوتون عالم گوزل اولسا

آرتيقدير هاميدان يئنه مه پاره منيم چون

ناز ائت منه، اي سئوگيلي جـانـان منـه نـاز ائـت

((  يانسين ديليم آغزيمدا دئسـم نـازيـوي آز ائـت
ناز ائت منه، اي سئوگيلي جـانـان منـه نـاز ائـت))

اوّل بـاخيشينـدا منـي حئيــران ائلــه ديــن ســن
بير اينجه گولـوشلـه اوره گيـم قـان ائلــه ديــن سـن
سـونـرا منـي بيـر لطفيلـه خنـدان ائلــه ديــن ... سـن
كافيـر قيـزي آخيـر منـي صنعـان ائلــه ديــن سـن
((يانسين ديليم آغزيمدا دئسـم نـازيـوي آز ائـت
ناز ائت منه، اي سئوگيلي جـانـان منـه نـاز ائـت))

خلـق ائيلـه ميـش اؤز كئيفـي گلنـده سنـي تـاري
اؤلـدور بـو بـلادن منـي قـورتــار سنــي تــاري
رحـم ائـت منـه، بيگـانييـه نـاز ائيلــه مــه بــاري
آلقيـش ائلـه بيـر عـاشيقينــي محــرم راز ائــت
انصـاف ائلـه اؤز عـاشيقينـي محــرم راز ائــت
((ناز ائت منه، اي سئوگيلي جانـان منـه نـاز ائـت))

آيينه نـي حئيـرتـده قـويـوب، عكـس جمـاليـن
خورشيدي خجـالتـده قـويـوب عـارض ِ آليـن
عاشيقلـري حسـرت قـويـوب زولفيلـه خـاليـن
بلكـه اولا قسمــت بيــزه گــولــزارِ وصــاليــن
هردن بو سينيق كـؤنلـومـو بيـر لطفلـه سـاز ائـت
((ناز ائت منه، اي سئوگيلي جانـان منـه نـاز ائـت))

گـؤردوم، گـؤزه ليـم، اوزگييـه سـن نـاز ائلـه ينـده
آز قالدي كي، روحوم اوچا، جان قالمادي منده
بـو نـاز و نـزا كــت وارايكــن بيــر بئلــه سنــده
درد اهلـي اينـان دوشمـه يـه بيلمــز بــو كمنــده
دائـم بـو گـؤزه ل خلقتــه ميــن رازِ نيــاز ائــت
((ناز ائت منه، اي سئوگيلي جانـان منـه نـاز ائـت))

تفليس شهرين ائيله ميش هر كيمسه كـي، ايجـاد
جنّت كي، دئييرلر، ائـديـب ايجـاد اونـو شـدّاد
بـوردان آپـاريـب حـوري و قيلمـان و پــريــزاد
يـارب، بـو پـريچهـره لــري بنــده نــواز ائــت
((ناز ائت منه، اي سئوگيلي جانـان منـه نـاز ائـت))

دونيا اوزونه يـاخشـي گـؤزه لـر گليـب هـرچنـد
اولمـاز سنـه بيـر اؤلكـه ده نـه ميثـل، نـه مــاننــد
تبريز، باكي، تهران، شكي، شيروان، قوبا، دربند
گنجـه، قــارابــاغ، شهــر بخــارا و سمــرقنــد
ايسترسـن ا گـر، عـزم رهِ مـولـك ِ حجـاز ائـت
((ناز ائت منه، اي سئوگيلي جانـان منـه نـاز ائـت))

اولمـا گـؤزه ليـم، صـورتينـه بيـر بئلــه مغــرور!
مـن ائتميشـم عشقيملـه سنـي عـالمــه مشهــور
هيجرينـده منـي ائيلـه مـه غـم چكمگـه مجبـور
درگـاهـه منـي قـول دئيـه، مــاننــد ايــاز ائــت
((ناز ائت منه، اي سئوگيلي جانـان منـه نـاز ائـت))

واعـظ، ائلـه ظـن ائيلمـه، حقـي دانيـر عـاشيـق
نه كعبه، نه بوتخـانـه، نـه مسجيـد تـانيـر عـاشيـق
لاكن اؤزونو حق سئـوه ن انسـان سـانيـر عـاشيـق
دونيـاده فقـط بيـرجـه محبّـت قـانيـر عـاشيــق!
سن گئت هلـه، اؤلمـوشلـره تكليـف نمـاز ائـت
((ناز ائت منه، اي سئوگيلي جانـان منـه نـاز ائـت))

واحیـد، دئمـه مــن دائمــي يــم ذؤق و صفــاده
منصـــوري ده يـاد ائتمـه لـي ييــك دارهِ فنــاده
بـو مصـرع ِ نـازي او دئميــش بيــر بئلــه ســاده
يــارب، ســن اونــا رحمتينـــي ائيلـــه زيـــاده
قبر ايچره اونـون روحـونـو لطفـونلـه فـراز ائـت
((ناز ائت منه، اي سئوگيلي جانـان منـه نـاز ائـت))

 

 

اولسایدی میسّر !!!

اولسایدی میسّر، گـؤزه لیـم، یـاریـن اولاردیـم

هر لحظه غمین چکمگه غمخوارین اولاردیم

هر شب دولاشیب صبحه کیمی شمع ِ جمالین

پـروانـه کیمـی، طـالـبِ دیـداریــن اولاردیــم

ممکن کی دئییل بیرده گـزیـم گلشـن ِ کـویـون

ممکـن گـر اولایـدی، یئنـه زوّاریـن اولاردیـم

ای طوطی وشیم، آیئنـهٔ حُسنـونـو گـؤرجـک

آلــودهٔ اول لعــل ِ شکــر بــاریــن اولاردیــم

مجنون کیمی دایم، سـر کـویـونـدا گـزه ردیـم

عؤمـروم نقـدر وارسـا، پـرستـاریـن اولاردیـم

یوسیف کیمی وئرسه یـدیلـه دینـدارینـا قیمـت

جان نقدی ایلـه مـن ده خـریـداریـن اولاردیـم

واحید، سر ِ کویوندا گزه ردیم گئجـه ـ گـونـدوز

ای مـه، بـو ادا ایلـه دل افکــاریــن اولاردیــم

سن کیمی جانانه سئوگیلیم؟

 

وورما اوقاره تئللرینه شانه سئوگیلیم

ائتمه منی بلاکش دیوانه سئوگیلیم

یاندیردی حسرتین منی، گؤستر جمالینی

کؤنلوم اولوب اول آتشه- پروانه سئوگیلیم

بیر دفعه ائیله دیمسه، تمنای وصلینی

یوز دفعه یاندیم- آتش هجرانه، سئوگیلیم

گزمه رقیبله منی غیرت هلاک ائدیر

سالما بلالی عاشقینی قانه سئوگیلیم

گؤسترمه قاره خالینی، کؤنلوم فغان ائدیر

قوش، ده‌ن، گؤرنده تئز گلیر افغانه سئوگیلیم

یوز لیلی گؤرسه حسنونی مجنون اولار سنین

عشقینده اوز قویاردی بیابانه سئوگیلیم

انصافی اولسا چرخ، بو بیچاره   واحیدی

حسرت قویارمی، سن کیمی جانانه سئوگیلیم؟

ای گوزوم ...

ای گوزوم عالم اینسانلیغا محرم سن اگر

ساکن اول مجلسِ میخانه‌ده، آدم‌سن اگر

عرفا اهلی ایچون مجلسِ مئی جنّت‌دیر

قویما بو بزمه قدم، اهلِ جهنم‌سن اگر

مئی ایچیب، سرخوش اولوب، اؤزگه‌نی تحقیر ائیله‌مه،

سن اؤز اطوارینی تحقیر ائیله، سرسم‌سن اگر

ئولچوده‌ن خارجه چیخما، ییخار آخر سنی مئی،

توت الیم کی، هامودان ایچگیده محکم‌سن اگر

مست و مدهوش زامانیندا بیر آیینه‌یه باخ،

اؤزون اؤز عکسینی تصویر ائیله اعلم‌سن اگر

گور، سنی باده نه حاله سالوب، ای خانه خراب،

آغلا اؤز حالینه بیردم، نولا، خُرّم‌سن اگر،

حیف‌دیر باده‌یه صرف ائتدیگین اول شانلی حیات،

بیلّیک اوغروندا اونی صرف ائیله، حاتم‌سن اگر

مبتلادیر بو بلایه، دئمه، واحید اؤزی‌ده،

اونی‌دا علم‌ایله تشویق ائیله، آدم‌سن اگر

بیر دایان گوروم

گئتمه بونازایله، گوزه لیم ، بیر دایان گوروم

عشقینده من یانان کیمی بیر سن‌ده یان گؤروم

درد اؤلدوره‌ر منی سنی گر بیرده، سئوگیلیم

خائن رقیبلرله گؤلوب اوینایان گؤروم

چشم زمانه‌دن سنه آفت توخونماسین

دائم او قاره زلفی گؤز اوستونده یان گؤروم!

نه لاله بیتمه‌سین، نه ده سونبول، سن اولماسان

نه شاخ گول‌ده بولبول ایچون آشیان گؤروم

مستانه گؤزلرین کیمی سن مست سن هله

چوخ باخما، نازایله، گؤزه‌لیم، بیر اویان گؤروم!

واحید، جهاندا هر گؤزه‌لین دوشسه‌م عشقینه

بیر خیر گؤرمه‌سه‌م ده، گره‌ک مین زیان گؤروم

بلکه ده لیلا دلی دیر ...

دئمه مجنونا دلي،بلكه ده لئيلا دلي دير

عشق اولان يئرده بوتون عاقل و دانا دلي دير

 سالدي يوسف كيمي اؤز سئوگيليسين زندانه

قويدو رسواليغي عالمده زوليخا،دلي دير

 عشق زنجيرينين افتاده سي بير من دئييلم

هوسي- سلسله- عشق ايله دونيا دلي دير

 ساريلير چيينينه،گاه بوينونا،گاه قامتينه

اژدهالر كيمي اول زولفي- چليپا دلي دير

 بير وفاسيز گول اوچون ناله سي دونياني توتوب

عاشيقين قلبي كيمي بولبولي شيدا دلي دير

 بيرجه شيرين ايله فرهاده مزمّت يوخدور

وادي- عشق ده وامق دلي،عزرا دلي دير

 ال گؤتورمز بو قارا گؤزلولرين زولفوندن

هر يئتن ظن ائيله يير واحيدي،گويا دلي دير

جان ایسته ییرم

 

 

گولده ن آرتیق منی ای جیسمیمه جان ایسته ییرم

گونده یوز یول ائده سن باغریمی قان ایسته ییرم

آشکــارا آغـــلاسام هــــیجرینده گـــولر بـــیگانه

خــلقدن من سنی کــؤنلومده نهان ایسته ییرم

ایــنجیمه گر سنی اولّــده دئدیم ایســته میرم

قــیلمادیم ســرّیمی اغــیاره عـیان ایسـته ییرم

آیــریلیق دردی قـوجالدیب مـنی غمده ن ئولیرم

ئـینه ده من سـنی ای تـازه جـوان ایسـته ییرم

نــه اولور بــیرده آلایــدیم یئنه آغــوشه ســنی

ائــله بیر فـرصتی خیلی زامـان ایســته ییرم!

گـول کیمی بیر کـره ئـوپمکه قزارتدیم اوزونی

دئمه گل منده ئوپوم کی قانا قان ایسته ییرم

واحـــــیدین قلبینی اینجیتمه سینار شاعیردیر

جان دان آرتیق سنی ای غنچه دهان ایسته ییرم

رعنــــــــاکیمی اولماز!

 

هر گـول آچیلا، اول گولی-رعنا كیمی اولماز،
هر عاشق اولان بولبولی-شیدا كیمی اولماز!

مـــین لرجه بو دونـــــــــیایا گؤزللر گله بیرده،
من سئودییم اول شوخی-دل آرا كیمی اولماز!

گولدن او تمنّانی كی،بولبول قیلیر هردن،
مین باشقا تمنّا بو تمــــــنّا كیمی اولماز!

فخر ائتمه سین اؤز سئودییی لئیلاسینا مجنون،
مین لیـــــــلی اگر گلسه،بو لـــیلا كیمی اولماز!

واحــید،دئمه كی،عطریلی گوللر یئتیشیبدیر
هر عطر گلیب عنبری-سارا كیمی اولماز!

آخشــــاملار

دوشنده طره ی دیلبر خیاله آخشاملار

محبّت اهلی باتار مین ملاله آخشاملار

شکسته بولبوله بنزه‌ر بلا چکن عاشیق

گولوندن اؤتری ائدر آه و ناله آخشاملار

گونوزلر عاشیقه طعن ائتمه کی، گولوب دانیشیر

سالار فراقین، اونی گور نه حاله، آخشاملار

دوشه‌نده زولفون اوزه، قاشلارین خیاله دوشر

باتاندا گون، باخار عالم هیلاله آخشاملار

شرابی یارسیز ایچسه‌ن بیر آزدا غم گتیره‌ر

گول اوزلی یار ایله اول هم‌پیاله آخشاملار

بیر اؤزگه لذّتی وار، عاشیق‌ایله معشوقه

رقیب‌سیز اولا محرم وصاله آخشاملار

میسّر اولماسا گوندوز سنه شراب ایچمک

اوُنوتما، واحد، اونی لامحاله آخشاملار!

جان دیمیشم!!!

 

گوزلرین قاره سینـه بیر نیچه قربان دیمیشم

قاشلارین طاقینـه قربان یرینــه جان دیمیشم

 

راز پنهانیمی خلق ایچره منیـم فاش ایله دیـن

بی وفا، من کی سنه سریمی پنهان دیمیشم

 

خوبلــر جمله گدادیــر سـر کوینــده سنیـن

سنه بو خوبلــر ایچــره مـه تابان دیمیشــم

 

قاشینا تیغ دیدیـم قانیمی تو کمک نه ایچـون؟

توت کی، ظالیم، نولا بوباره ده بوهتان دیمیشم

 

اینجییوب چیخسا سینه مدن یری وار پیکانین

کی، نیچون باغریما گلدیکجه باسوب، جان، دیمیشم

 

واحیدم، قویمایین،ائولدوردی او مهپـاره منی

سهو ایدوب گل اوزونـه مهر درخشان دیمیشم

عشق کمندی ... !!!

او قارا زولف کی هردم دولاشیر شانه لره

گوستریر عشق کمندین دل دیوانه لره

مهر رخسارینی مندن کسوب اول ماه تمام

دوشدی فرصت یئنه بوندان بئله بیگانه لره

یوخسا ائی گول بوقده ر باده ناب ایچمزیدیم

شوق لعلین منی جلب ائیله دی مئیخانه لره

قانا دونسون گوروم او باده گولگون سنسیز

بیرده گر رغبت ائدیم ساغر وپیمانه لره

حسرت چشم خمارین لب لعلین هوسی

گوستریر گوشه مئیخانه نی مستانه لره

شوق رخسارین ایله اودلارا یانمیش کونلوم

اویره دوب  شمعده یانماقلیغی پروانه لره

جورین آز ائت منه قورخوم بودو بیر آه چکیم

بیر یانا اود دوشه باشدان-باشا کاشانه لره

واحدم شاعر آزاده پرستم نه غمـــــــیم

قیلماسام رغبت اگر مسجده بتخانه لره

ائی ییخان کونلوم ائوین... !!!

ائی ییخان کونلوم ائوین، قیل حذر افغانیمدان!

ائوین آباد اولا، ال چک دیلی ویرانیمدان

 

منی مجنون ایله فرهاده برابر توتما

من اولاردان دا هنرلر کئچنم جانیمدان



بیرجه گل گور نه جفالار چکیرم زولفوندن

خبرین یوخدو سنین، حالی پریشانیمدان



طعن ائدیر ائل منه :یارین نه وفاسیز چیخدی؟

ای وفاسیز، دئمیرم من بونو اوز یانیمدان



سانکی باشدان-باشا بیر شعله ئ-عشقم گئجه لر

شمع لر اودلانیر آهئ- دیلی-سوزانیمدان



نئیلرم من گولو، یا لاله نی انصافیم وار

اونلارین هانسی گوزلدیر رخ جانانیمدان!



واحیدم، عصریمیزین ایندیکی فرهادی منم

کیم منی آیری سالار خسروئ خوبانیمدان

موسیقی

موسیقی نشئه سی مین سوگیلی جانانه ده یر

اثر ناله نی٬ عارف ایچون جانه ده یر

موسیقی اهلینه انصاف ایله قیمت قویماق

لحن داود ایله٬ مین تخت سلیمانه ده یر

بیخبرلر نه بیلیر لهجه خواننده نه دیر

اهل حال اولسا ، بو سؤز قدرده میلیونا ده یر

پرده غم داغیدیر تاره ده ینده میضراب

طره دلبره هردم نئجه کی شانه ده یر

موسیقیله اولار هر خسته یه عالمده علاج

بو طبابت نئچه مین چاره لوقمانه ده یر

بیزه بو علم حرام اولموش ایدی کئچمیشده

یعنی شیطان ایشی دیر ، رخنه سی ایمانه ده یر

یاشاسین قرمزی شهرتلی وطن قانونی

بوسخاوت نئچه مین حاتم دورانه ده یر

قیلدی هر یئرده بنا موسیقی مکتب لرینی

نغمه نین فایده سی ایندی هر انسانه ده یر

خلقیمیز موسیقی علمین اوخویور مین لرجه

ئولکه میزچون بو شرف مهر درخشانه ده یر

موسیقیله منی دفن ایله سه لر واحد اگر

قبریمین تورپاغی مین روضه رضوانه ده یر

کونول

اویما هر زولفی قارا، سئوگیلی جانانه، کونول

بو وفاسیزلار ائدرلر سنی دیوانه، کونول

مومکون اولدوقجا چالیش یانمایاسان عشق اؤدونا         
شمع ‌دن گورنه چکیر هر گئجه پروانه، کونول      

سن هله عشق کمندینده اسیر اولمامیسان
اویما مجنون کیمی هرزولفي پریشانه کونول

گولده اولسایدی وفا، خاریله یار اولمازیدی
بولبولون آهی یاییلمازدی گولوستانه، کونول

آشينا اولماق عبث دیر بو پری چوهره‌ لره
یئنه بیرگون اولاجاق‌لار سنه بیگانه، کونول

سئودیین اؤلسا زولیخای زامان، سن یوسیف           
فکرائدیب سالدیراجاق‌دیرسنی زيندانه، کونول

واحید ین عومرو بوتون نازلی گوزل ‌لرله گئچیب
بو حقیقت سوزو ظن ائیله‌ مه افسانه، کونول

عشق اولماسا،وارلیق بوتون افسانه ‌دیر!!

سئوگیلیم،عشق اولماسا،وارلیق بوتون افسانه ‌دیر

عشقیــده ن محــروم اولان،انسـانلیغــا بیگــانه ‌دیر

سئـوگی دیـر،یالنیــز محببت‌دیر حیــاتین جـوهــری

بیر کونـول کی عشق ذوقین دویماسا،غمخــانه‌ دیر

من اسیــر عشقییــم،اوز خـالقیمین،اوز یـوردومــــون

سئــومــه یـن اوز خالقی‌نی،اوز یـوردونــو دیوانـه دیــر

قوی وطن داییم ایشیقلانسین،گوزل بیر شمع تک

کونلوم  اول شمعین ضییاسین سیر ائدن پروانه‌دیر

نـازنیــن  رعنـــــا گـوزل ‌لــردیــر،بـاخیـرسـان هـر یـانــا

بس بو تورپــاق اینــدی بیر جننت دگیــل،آیـا نـه ‌دیـر؟؟

اولکـه میـزده گور نلــر وار،باشقــا بیر عالـم ده ‌ییک

هـر چیچک بیـر نـازنیــن  هر غنچـه بیــر جـانـانـه ‌دیــر

واحید م   من،سئوگیلیم،من‌ دن خیانت گورمه ‌سن

شاعیــرم،عشقیم ده اوز قلبیـم کیمی مـردانــه‌ دیــر

مستانه‌ سیز اولماز!

زولفون نییه بیر آن، گوزه‌لیم، شانه‌سیز اولماز!

عادت بئله‌دیر عشق ائوی بیگانه‌سیز اولماز!

طعن ائیله‌مه، زولفوندن اوُزاقلاشماسا کونلوم

بیر یئرده کی زنجیر اولا، دیوانه‌سیز اولماز!

غمدن یانیرام، رویونی گوسترمه رقیبه

بیر شمع کی، شوق آرتیرا، پروانه سیز اولماز!

مخمور گوزون قویمادی بیر کونلومی راحت

بیردم بو ستم خانه‌سی مستانه‌سیز اولماز!

سن شوقِ لبِ یارایله ایچ، باده ایچینده

کیمدیر دییه، مئی مجلیسی پیمانه‌سیز اولماز!

بیر دلبرین عشقینده بوتون دیللره دوشدوم

هنگامه‌دیر، عشق عالمی، افسانه‌سیز اولماز!

واحد مئی ایچیر گیزلی، دئییرلردی ائشیتدیم

او رندِ خراباتی دیر، میخانه‌سیز اولماز!

... مندن ...!!

سن زلفینی آچ توک اوزونه ، شانه سـی مندن                               

                                زنجیری نشان وئر منـه ، دیـــــوانه سی منـدن

سن عاشقی یاندیرماقـا ، من یانماقـــا مایــیل                               

                                سن شمعینی گوستر منه ، پروانه سی مندن

زلفـون قـدری عاشــق اولان وار سنــه ای گـول                               

                               سن سویله او مجنونلاری  افسـانه سی مندن

سرمست گوزون فتنه، لبیــن نشئـــه لـی باده                               

                                ایچدیــر منــه اول بـادنــی پیــــمانه سی منـدن

سن ناز ایلـه گول کی صدفین قــیمتی آرتسین                               

                                کوزیاشی کیمی، اینجیسی دردانه سی مندن

هردم گـؤتـور اوزدن گوزه لیــم، افعـی لی زلفین                               

                                چک ظاهـره گنجینــه نی، ویـــرانه ســی منـدن

واحــد می ای تـــرک ائتـمک اوچــون پیــرمغانیـن                               

                                رنجیــده اولــوب بیرنئچـه مســـتانه سی مندن

 

دئدی...

دئدیم:ای غنچه دهن،کونلومو قان ائیله میسن،

دئدی:بیجا یئره عشقیمده فغان ائیله میسن!

دئدیم:انصاف ائله،اینجیتمه منی،عاشیقینم،

دئدی:گئت،سیرریمی دونیایا عیان ائیله میسن!

دئدیم:- آغلاتما منی سرو بویون شوقونده،

دئدی:گوز یاشینی بیهوده روان ائیله میسن

دئدیم:- آخیر گوزه لیم،باغ و باهاریم سنسن،

دئدی:- سن عومرونو حسرتله خزان ائیله میسن.

دئدیم:- آز چکمه میشم گوزلرینین حسرتینی،

دئدی:- اوز کونلونو یئرسیز نیگران ائیله میسن.

دئدیم :عشقینده اسیرم،منه بس خیری نه دیر؟

دئدی:- اولده بو سئودادا زیان ائله میسن.

دئدیم:عشق اتشی نئیلر منه،قورخان دئییلم!

دئدی:-بیچاره یانارسان نه گمان ائیله میسن؟!

دئدیم:- ای گول،من ازلده نده گوزل عاشیقییم،

دئدی:- سن روحونو عشق ایله جاوان ائیله میسن.

دئدیم:- هر گون سر-کویوندا دولانماقدیر ایشیم،

دئدی:- واحد،نه گوزه ل یئرده مکان ائیله میسن!

ای گوزه للیک تانریسی...

 

 

سئوگیلیم،سیرگلستان یاخشیدیر،سن یاخشیسان؟

عاشیقین چین باشقا جانان یاخشیدیر ،سن یاخشیسان؟

مین منیم تک عاشیقی حئیرتده قویموش گوءزلرین

سئوگیلیم بیرسوءیله ،جیران یاخشیدیر،سن یاخشیسان؟

بیر دونوءب باخماقلا تئز آلدین،آپاردین کونلومی!

اولاییب چالماقدا طرلان یاخشیدیر،سن یاخشیسان؟

گوءک اوزون ای روءشن اتمیش حسن ایله سن یئر اوزون

نازنینیم،ماه تابان یاخشیدیر،سن یاخشیسان؟

سن کیمین جانان اوچون جاندان کئچن بیر عاشیقه

ای گوزه للیک تانریسی،جان یاخشیدیر،سن یاخشیسان؟

سنده وارکن نازایله گولمک ،دانیشماق ، اینجه لیک  

لطف ده ،گلبرگ خندان یاخشیدیر،سن یاخشیسان؟

مجلیسین خلوت،تیگارین واحیــــــد الده مئی توتوب

گوءر ،یوخوش عالمده سلطان یاخشیدیر،سن یاخشیسان؟