شاه اسمائيل ختائي/ياري گؤردوم

 

ياري گؤردوم بو گون خندان اوتورموش،

ياناغي تازه گول ريحان اوتورموش.

يوزونه قارشي غؤنچه گولدوگيچون،

سحر آغزينا چالميش قان اوتورموش.

سنينله هوسن ايچينده بحث ائد نلر،

نئده پئشمان اولوب، حئيران اوتورموش.

سنين سيبي-زنخدانينا، ائي دوست،

نه حديم وار دئسم، دن دان اوتورموش.

دوداغين چئوره سينده قوشا خال لر،

ايكي زنگي اونا دربان اوتورموش.

سنين ليلي جمالين گؤرمك اوچون،

يولوندا مجنوني-حئيران اوتورموش.

ختائيــــه نظر قيل چئشمين ايلن،

قاپوندا صوبحي-شام گيريان اوتورموش.

 

شاه اسمائيل ختائي

عشقینده فرهاد اولموشام

ائی پری، شیرین لبین عشقینده فرهاد اولموشام.

تا سانا قول اولموشام، عالمده آزاد اولموشام.

تاکی، سن دن آیرو دوشدوم، ائی دیلرامیم منیم،

دمبه دم در نالوو افغانو فریاد اولموشام.

گرچی غمگینم غمی-هیجرینده، ائی آرامی-جان،

تا سنی گؤردو گؤزوم غمگین ایکن شاد اولموشام.

ائی سنم بو مؤهنتی-هیجرو فراقین دان سنین،

گر خراب ایدیم، ولی وصلین دن آباد اولموشام.

تا سنی گؤردی ختائی بیلمز اؤزون خاندا دیر،

تا سانا من آشینا بولدوم، اؤزوم یاد اولموشام.