دريا قوشويام قورخودا بيلمز مني طوفان
نئيلر بير اولو داغه اگر پوسگوره طوفان؟
طوفان دا نه قدرت كي مني سالسين آياقدان
ائلدن كوءكوم ائل كوءكونه باغليام هر آن
كسگين قلميم آلدي گوجون ائل نفسبندن
تا جامعه نين دردلرينه ائيله يه درمان
آي شانلي مقدس آنا اي كوءهنه ديياريم
هر امرينه آماده يم ايندي ندي فرمان؟
سنسن وئره ن عالمده منه شهرت و شوكت
سنسن منه شعريمده اولان سئوگولو جانان
آي شانلي وطن ياخشي بيليرسن كي يولوندا
چوخ واخت اوتوراق يئرمنه اولموش قارا زندان
لاكين مني سارسيتمادي بو قورخولو حالت
ميلچك قانادي يئتمه دي ايمانيما نوقصان
دوشمان ديليمين خورلوغونا خيلي چاليشدي
آخيرده اوشوم مقصدينه تاپمادي امكان
گوندن گونه اوءتگم ديليمين شهرتي آرتدي
گوءستردي كي ديل محمو اولاماز محو اولا دوشمان
"بال" اولسادا بيگانه ديلي منجه زهر دير
اوءز دوغما ديليم ديركي شيريندير منه بالدان
بير بويله حقيقت سسي يوكسلمه ده افسوس
هرعصرده حقسيز ليگه محكوم اولوب انسان
چوخ "حق بشر" دن دئديلر لفظ ده آمما
معناده ندن چاتمادي اوءز حقينه بير قان !
آسان اولو موشگول لر اگر اولسا اراده
اولماز كيشي عالمده چتين ليكده هراسان
قطعا چاتار ائولاد وطن حقينه بير گون
اوگونكي نه ارباب ستمگر قالا نــــــه خان
غم چكمه كونول بير يئني دوران اولار اوندا
شادليقدان اولار توتقون اوره ك لر يئنه خندان
عصرين ديلي زحمت كشه اوندا بئله سويلر:
چاپ غضبكارين نعشينه بو آت بودا مئيدان!
چوخلار ديله يير وصلت جاناني ولاكين
جاناني آتار تهلوكه يه دوشسه اگر جان
يازديم بو گوءزل شعري "نظامي" ساياغيندا
( حسنون گوءزل آيت لري آي سئوگيلي جانان )
مين فيرتينا باشيندان آشيب داغ كيمي دوردو
مين رنگه بو "شــــــــيدا "ني بويانديرمادي دوران!
يحيی شيدا
بیرعده سئوه ر جهاندا سئیر چمنی