م. خوشنام/دره خلوت ـ تولكو به يدي

آغ  يـئرينه  يــــازدي  قــــارا

خيــالينـدان   چـــكدي   دارا

مــرد اينســــاني  آياقــــلارا

زامـان سـالدي،  زامــان ايـدي

دره  خلوت ـ  تولكو  به يدي

 

 نــئجـه  چـكيم  سـؤزه  پرده

مـني ســـالدي يــــامان درده

گـــؤردوم   مــرد ايـير نامرده

اوره يـيمه   گـوللـه  ده يــدي

دره خـلوت ـ  تولكو  به يدي

 

يازيق  (( خوشنام )) آليش اودا

اورمــانلاردا   گــئتدي بــادا

شـعر  بــوغولور  دار  يـووادا

بــو قــالماقدان اؤلوم  يئيدي

دره خلوت ـ  تولكو  به يدي.

 

م. خوشنام

سحرخانیم/هانسی یوللاردان گلیرسن...

 

سيغمايير ايستـكلريم منطقلرين اركانينا

ايسته يير  عنوان اولوم ديوانه لر ديوانينا

سن آچان گونــدن قاپانميش يوللاري رؤيالره

مين ديلك ايلمك له نير هردم كونول دامانينا

هانسي يوللاردان گليرسن گؤيده اولدوزلار گولور

چن دوشور حسرت قباسيندان باخيش ميـدانينا

سن دوننلر باغــچاسيندا اكديگيم بير آرزوسان

گئج بئجردين دوشمدي كؤلگن گؤروش ايوانينا

دامجي-دامجي قان داميركن، قلبيمين پيمانه سي

دالـــغا-دالـــغا يوكســلير ميــدان وئرير طوفـانيـــــنا

قوي اؤره ك درياي عشق اولسون،بوتون وارليق كيمي

قــــوي چئويرسين  دالغـــالار دونيـــاني قان عمــــانينا

 

سحرخانيم