میکائیل مشفق /آذربايجاندانام، آذر اوغلويام

سوروشسالار كيمم، هارالييم من

آذربايجاندانام، آذر اوغلويام

آتام قوجا قافقاز، آنام بو وطن

آذربايجاندانام، آذر اوغلويام

 

بوردا دده قورقود بويلاري قوردو

سالسالي، بابكب اجنبي ووردو

نظامي، فضولي، نسيمي يوردو

آذربايجاندانام، آذر اوغلويام

 

((اَوستا))،((خمسه سي)) عصمت چيراغي

زردتشتين وطني مين جنت باغي

فسونكار، بهره لي هر بير اويلاغي

آذربايجاندانام، آذر اوغلويام

 

نئچه اشغالچيلار باج-خراج آلدي

عصير-عصير يادلار الينده قالدي

هر دياري ثروت، جاهي-جلالدي

آذربايجاندانام، آذر اوغلويام

 

نئچه مين داهي يه آتا-آنا دير

قارتالي ذيروه لر خانا-خانادير

دنيا بير يانادير او بير يانادير

آذربايجاندانام، آذر اوغلويام

 

هر داشي تورپاغي تختي-تاجيم دير

هر داغي، آراني قبله گاهيم دير

هر اوغلو قارداشيم، قيزي باجيم دير

آذربايجاندانام، آذر اوغلويام

 

مدح ديانتلي بؤيوك صنعت لي

اَيلمز وسعتلي، دؤنمز غيرتلي

ايگيد-جسارتلي، شاعر-قدرتلي

آذربايجاندانام، آذر اوغلويام

 

طالعي تاريخي لرزه يه سالان

زال لار قيلينجيني داشلارا چالان

ارضين بهشت باغي، جنتي اولان

آذربايجاندانام، آذر اوغلويام

 

آزافلي عاليم لر حيراندير اونا

ائله ائولادي وار جهان دير اونا

يوز مين جانيم اولسا قورباندير اونا

آذربايجاندانام، آذر اوغلويام

 

ميكائيل آزافلي

حمیدسخامهر/سرگردان

 

عمر ياصددانه ده صرف اولدو ياپيمانه ده

باشماغيم مسجدده گئتدي  هوش باشيم ميخانه ده

مسجد وميخانه دن چونكي اليم چيخدي بوشا

گولدولر احواليما صددانه ده پيمانه ده

قالديم آواره ايكي يول آيريميندا نيله ئيم

استخاره ايله ديم يول وئرمه دي صددانه ده

سانماكي ايندي منم آواره سرگردان قالان

خلق اولانلار جمله سرگرداندي بو ويرانه ده

دونيادا عاقل دگيل تنها حقيقت آختاران

دوز يولون آردينجا سرگردان گزير ديوانه ده

قالدي آنجاقكي ئوكلرده حقيقت حسرتي

حققه جاهل سهليدير ال تاپمادي فرزانه ده

گلدي هاردان بير ايشيلتي گئديك استقبالينا

اود دوتوب دوندوق كوله من ده يازيق پروانه ده

اولمادي زولف ايچره آنجاق بيرمنيم كونلوم اسير

خرمن زولف ايچره سرگردان دولاندي شانه ده

نيله-مك سن ياناسان من يانماسام بيزيانماساق

كعبه ده دائيم قارانليقدا قالار بتخانه ده

يانماسين عاشق سخا  عشق آتشينده نيله سين؟

عشق ادودوندا قاولور بير حالداكي جانانه ده

 

تبريز/حميدسخامهر

دئمیشم

ديل آچاندان آنامين هر سؤزونه جان دئميشم

بو عزيز توپراغيما آذربايجان دئميشم

من كی بولبول دئييلم هر چيچگه عاشيق اولام

بير يانار عشقيله اؤز يوردوما جانان دئميشم

سئويرم توپراغيمي ، خلقيمي من بير آنا تک

ائليني سئوميه-نه نانكور نادان دئميشم !

ترجمه فارسی:

از وقتي كه زبان به سخن گفتن گشوده ام به تمام حرفهاي مادرم جان گفته ام

به اين خاك عزيزم آذربايجان گفته ام

من بلبل نيستم كه به هر گلي عاشق شوم

با يك عشق آتشين به ديار خودم جانان گفته ام

دوست دارم خاكم را ، مردمم را همانند يك مادر

به هر كسي كه ايل و تبار و هويت خودش را نشناسد نادان حيف نان گفته ام!

توت الیمد‌ن آپارمنی تبریزه ....

 

 *عاشیق اولدوز

توت الیمد‌ن آپارمنی تبریزه .... 
 
قسمت اولوب بو گون قوناق گلمیشم ,  
 توت الیمدن آپار منی تبریزه 
بو گوروش, بو میثال گلمه‌سین بیزه  
توت الیمدن آپار منی تبریزه 

آیلا چیخیم گون‌له شفق ساچیم 
 دورنا كیمین ائلدن- ائله اوچوم 
ده ده شهریاردان صحبت آچیم
توت الیمدن آپار منی تبریزه 

لپه‌له نیم آرازی ایله آخیم من  
قارتال اولوم ساوالاندان باخیم من

هیجران قالاسینی سوكوم ییخیم من 
توت الیمدن آپار منی تبریزه 

عینی دیلده اؤتن دیللریمیز وار  
آراز لا بیر له‌شن سئللریمیز وار 
تبریز له باكی تك ائللریمیز وار 
توت الیمدن آپار منی تبریزه 

" اولــدوز" دیله‌ر هئچ‌كس ائلدن كؤچمه‌سین 
بیرجه قوش‌دا یووواسیندان اوچما‌سین 
اوغلوم, قیزیم یادلارا ال آچماسین 
توت الیمدن آپار منی تبریزه 

دیده ی گیریانیمی قایتار !!!

جانیم سنین ولی ای گول ایمانیمی قایتار

ایماندا سنین قلب پریشانیمی قایتار

گوز یاشیمی توکدوم گئجه گوندوز سنه خاطیر

گوز یاشدا سنین دیده ی گیریانیمی قایتار

رسمیدی کی قوربان پایینی قایتاران اولماز

سیندیر بو قوجا رسمینی قوربانیمی قایتار

من ایستدیم کاخ سلیمان منیم  اولسون

کاخلاردا سنین کلبه ی ویرانیمی قایتار

سنی غملی گورنده ...

 

اولارام درده همدم
سنی غملی گؤرنده
ساچلاریما دوشر دن
سنی غملی گؤرنده

بوران اولار قار اولا ر
ایشیم آه و زار اولار
دونیا منه تار اولار
سنی غملی گؤرنده

او گونش اوزونو غم
بورومه سین دومان کم
ساچلاریما دوشر دن
سنی غملی گؤرنده

بوران اولار قار اولار
ایشیم آه و زار اولار
منه دونیا تار اولار
سنی غملی گؤرنده

اسر کولک دایانار
گؤیلر قارا بویانار
عاشق اودلارا یانار
سنی غملی گؤرنده

بوران اولار قار اولار
ایشیم آه و زار اولار
منه دونیا تار اولار
سنی غملی گؤرنده

ای ساریبان آهسته گئت،

ای ساریبان آهسته گئت، آرام جانیمدیر گئدن
یار کونلومو چکمیش منیم، روح و روانیمدیر گئدن

سعی ائیله دیم افسونیله، پونهان قیلام من دردیمی
پونهان ایشیم چیخدی اوزه، سئیلیله قانیمدیر گئدن

قالدیم بئله زار و ذلیل، بیچاره یم قلبیم علیل
دوشدوم او دیلداردان اوزاق، آسوده یاریمدیر گئدن

یوخ عهدینین بونیادی هئچ، بیتمز اونون بیدادی هئچ
چیخماز کونولدن یادی هئچ، ان خوش زمانیمدیر گئدن

بیر آن دایان ای ساریبان، قویما گئده بو کاروان
اول سروه اویموشدور کونول، سروی روانیمدیر گئدن

بیر دون گئری ای نازنین، گؤز مسکنین اولسون سنین
سن سیز بو سونسوز گویلره، آه و فغانیمدیر گئدن

جان ترک ائدنده جیسمینی، اینسان آچار اوز حیسسینی
یوخدی سوزون گورموش گوزوم، بو خسته جانیمدیر گئدن

سعدی سنه لایق دئیل، یاردان گیلئی ای بیوفا
چوخ گوردوم اوندان من جفا، صبر و توانیم دیر گئدن

دولانیب روزگارین حالتی بیر اوزگه حالا

فلیین بیر بئله دؤورو اولاجاغمش، نه بیلیم؟
سارالیب، باغ و گولوستان سولاجاغمش، نه بیلیم؟

بیتیریب، باغ سالیب، بیر نئچه گوللر یئتیردیم،
اوزادیب دست قضا کیم یولاجاغمش، نه بیلیم؟

اورییم یاره لنیب، سینه مه داغلار چکیلیب،
گؤزومه قان ساغیلیب، یاش دولاجاغمش، نه بیلیم؟

ال چکیب ناکسدن، چرخ اؤزو ناکسیمیش،
تک بانا جور و جفالار قیلاجاغمش، نه بیلیم؟

بسلدیم زلفو، دئدیم، باشیما سالسین سایه،
دولانیب بوینا ایلان تک چالاجاغمش، نه بیلیم؟

عاشیقه ناز ائله مک عادت اولوب معشوقه،
بو قدر ناز ائله ییب جان آلاجاغمش، نه بیلیم؟

سلطنت رتبه سینه ناز قیلاردیم شاه ایکن،
منی باشدان-آیاغا غم ساراجاغمش، نه بیلیم؟

دولانیب روزگارین حالتی بیر اؤزگه حالا،
ای قاراداغی، سانا غم قالاجاغمش، نه بیلیم؟

هیجرینده کمان تک ... !!!

گل گل دیه هیجرینده کمان تک مه لدیم من

بیر عومری سنین عشقینه قوربان الدیم من

آسوده طیفلیدیم نه غمیم واردی نه دردیم

دردیمله سنین گوزلرینی سورمه لدیم

حسیم منه گل گل ددی عقلیم ددی گت گت

بوقانلی دویوشده منه ایمداد الدیم من

عشقیمده قاتیب جور منیم باشیما هرگون

بیر عشقین اوجوندان نقدر طعنه ادیم من

اوز حس سینی دوستاق ایلیه ن بختیار اولماز

اوز عشقیمه اوز کونلومی زیندان الدیم من

 

Könül Xasıyeva

باشقا بیر سحیر وار بو سسده دیلده

خیال جانا گلیر کونول اوخویور

ایله بیر سازاقلی بیر قیش گونونده

بوزو دلیب دشن ترگول اوخویور                        کونول اوخویور

سوینیر بو مجلیس محبت گولور

نور ساچان چراغلا سعادت گولور

بیر پوهره بوداغلا طبیعت گولور

عاشیق فراقیندا بولبول اوخویور                       کونول اوخویور

جاهیل یوخوسوندان آییلا بیلر

عاریف باشا دوشور  اوقانابیلر

آدامین اوره یی دایانا بیلر

بیرجه سببی وار کونول اوخویور                      کونول اوخویور

 

قوخلاييب آتديغين گوله قاييتما

ايندي کي، گئديرسن سون باهار کيمي
قاييتما گئرييه دورنالار کيمي
ياشا زيروه لرده، ياشا قار کيمي
چئوريليب ياغيشا، سئله قاييتما

ايللريم ناحاقدان اوتدو سنينله
دئميرم عومور- گون بيتدي سنينله
گئتدين، نغمه لريم گئتدي سنينله
ايندي غملي اوتن تئله قاييتما

سن گلدين عومرومه دومان، چن کيمي
ياشارسان ساچيما دوشن دن کيمي
باري بوندان بئله ياشا من کيمي
قوخلاييب آتديغين گوله قاييتما 

 نصرت کسمنلی

آتش عشقده جسمیم کیمی سوزان اولاسان

گؤروم، ای زلف گره گیر، پریشان اولاسان،
من تک آشفته لنیب بی سر و سامان اولاسان

اریدیب کؤنلونو گؤزدن تؤکن، ای چشمو غزال،
متصل دیدۀ عاشق کیمی گریان اولاسان

ای لب لعل، دوداغیم کیمی قانین قاچسین،
قانه دؤنموش جگریم تک دؤنه سن قان اولاسان

دوشه سن آتشه، ای خال، اولاسان خاکستر،
مجمر سینه ده باغریم کیمی بریان اولاسان

ای سر کوی، گؤروم ذوق و صفاسیز قالاسان،
جولشن نزهت ایکن کلبۀ احزان اولاسان

منزل اولدی منه دوزخ، گؤروم ای گولشن حوسن،
سرسر حادثۀ دهر ایله ویران اولاسان

ای قد و قامت موزون، اییلیب اینجه له سن،
آتش عشقده جسمیم کیمی سوزان اولاسان

ای دیل ساده، بو سوداده سنیندیر تقصیر،
یاناسان، اودلاناسان، خاک ایله یکسان اولاسان

ناصحا، سنده فغان ائیله مه، جانین چیخسین،
کیم دئدی عاشق اولوب، هجرده نالان اولاسان

بیلمرم کی می ندیر ...

ائیله مستم بیلمرم کی، مئی نه دیر، مینا ندیر!
گول ندیر، بولبول ندیر، سونبول ندیر، صحرا ندیر!

اود توتوب جانیم سراسر یاندی، اما بیلمدیم
دیل ندیر، دیلبر ندیر، باشیمدا بو سئودا ندیر؟

بیلمدیم عمرومده هئچ بیر کفرو ایمان هانسی دیر،
احمد محمود کیمدیر، موسی و عیسی ندیر؟

شاهباز اؤوج وحدت، واحد و حی و قدیم،
خالیق ارض و سما اول فرد و بی همتا ندیر؟

صدر ائیوان جلالت، شمع بزم کاینات،
آفتاب ارش عزت “لافتا ایللا” ندیر!

طورحاتی قوی کناره، رقصه گل دیوانه وار،
گل، خرابات ایچره گؤر بو شوریش و غوغا ندیر!

دورکی صافی گؤزله مک واختی دئییل، ساقی، آمان!
شیشه وئر، پئیمانه وئر، ساغر ندیر، صهبا ندیر!

دور، گؤزون قوربانییام، مستانه گل، ریندانه وئر،
چوخ دئمه جمشیددن، اسگندر و دارا ندیر!

لؤوحش لله، کیمدی بیلمم، عشق دیوانین یازان،
عاشیق و معشوق کیم دیر، وامیق و عذرا ندیر!

شاهید خلوت نیشینیم ائتدی روخسارین عیان،
عاشیق دیوانه، گل گؤر ظاهر و ایخفا ندیر!

یئتدی عمرون آخیره، سن بیر، نباتی ، بیلمدین،
کیمدی بو گؤزدن باخان، یا دیلده بو گویا ندیر؟

 

سیدابوالقاسم تباتی

سیررینی بیگانه بیلمه سین !

ای دل، آماندی، سیررینی بیگانه بیلمه سین !
آهسته زلف یاریده یات، شانه بیلمه سین !

دوشدون خیال دانۀ خال اشتیاقینه،
ای مرغ رفع، تیزپر اول، دانه بیلمه سین !

ای یار، جان فدای قدوم مبارکین،
آهسته قیل خرام کی، همخانه بیلمه سین !

غیرت هلاک ائده ر منی، آچما جمالینی،
گؤسترمه شمعه رویینی، پروانه بیلمه سین !

بیر لحظه بزم یارده دلشادم، ای کؤنول،
آرام دوت، بو مطلبی بیگانه بیلمه سین !

ای آه سرد، اورما نفس زلف یاره سن،
بیر دم قرار دوت، دل دیوانه بیلمه سین !

زاهید ائدیرسه عشقده تکفیر صابری،
ظاهیر گؤزیله کعبه نی بتخانه بیلمه سین !

تک گجه لر !

 

گئنه حسرت قاناتین آچدی منه درد وفـــــــراق

تا کی ظلمـــــتده قالان گونلری حسرتده یازاق

خاطریمدن گئچر اوخاطره لر شــــام و سحــــر

هئچ بیلیرسن نه گلیر باشیما سنسیز گئجـــــــه لر ...!!؟

 

زمانه

اینجیمه بختیندن باخ زمانیه

زمان اینساتلارا یول نیشان وریر

اوشاق بویوک آنا دیلین بگنمیر

اوشاقلار بویوگه یول نیشان وریر

چایلار جوشقون گلیر دونیانی یئخیر

یوخسوللوق چوخالیر کاسیبی سیخیر

کهریزلر قورویوب سو موتوردان چیخیر

لوله لر چشمه یه بئل نیشان وریر

گلین سسین قاینانیا اوجالدیر

غم شله سین مرد ایگیدی قوجالدیر

اوغلانلار ساچ قویور قیزلار آزالدیر

ایندی بی گلینه تل نیشان وریر

آجین مصیبتین نه بیلر توخلار

غیرتلی دردین اورگده ساخلار

پالچیق آراسیندان چیخان قورقودلار

شاهمار ایلانا دیل نیشنان وریر

که ل  آزالیب بیربیرینن دویوشمور

چاققال اوزون پلنگینن ده ئیشمیر

جیرانلار مات قالیب گلیب سو ایشمیر

قارقالار کهلیگه کئول نیشان وریر

ستار نه قدر یازسان سئوز گلیر

زمانین بعضی ایشی اورگی دلیر

کئوره کن قایناتیا بیر حربه گلیر

سیله سین وورماغا ال نیشان وریر

ستارخدائی/زنجان

آیریلماز/ مزارستان

 

 

بیر گون یولوم دوشدی مزارستانا

ایله حس ایلدیم دوران یاتبدی 

گوردوم انسانلاری سسیز صداسیز

بیلدیم دن قورتاریب دیرمان یاتبدی 

سویکدیم بیر داشا ناتوان دیزی

زیارت ایلدیم اخر اویمیزی 

گوردوم دار قبرده ظالم چنگیزی

ایلیب دنیانی ویران یاتبدی 

ایستد یم قایدام ایاق دایا ندی

باخدم بیر قبر .اورگیم یاندی 

دنیانی ترک ادیب بیر از زماندی

یار وصلین گورممیش جوان یاتبدی 

حیرصدن دیشلریم بیر بیرین یدی

گوزوم گاه اغلادی گاه گولومسدی 

داشین اوستوند کی یازیلار ددی

شاعر اهسته یری انسان یاتبدی 

القانا بویادی دیشیم دوداقی

هر ندن چتیندی اولاد فراقی 

گوردوم بیر قبرده خردا اوشاقی

اناسننان اوزاق گریان یاتبدی 

 

 

اویما بو دنیانن پیس مرامنا

دنیا سلیمانلار چکیب کامنا 

یولچی تعنه ورور شاه مقامنا

 اقادان یوخاری چوبان یاتبدی 

 

 

 

اوردا هیتلر دوروب جنایت اتمز

یولداش یولداشینا خیانت اتمز 

یوخسولوخ بیر کسی خجالت اتمز

توپراق ایچینده هامی یکسان یاتبدی 

 

توپراق التندا اریب بدن

گلدیگیم ندندی گتدیگیم ندن 

بیریسی تاپادی اوچ قارچ کفن

قراندریق مکاندا عریان یاتبدی 

 

اوردا نه جلاد وار نه دار اغاجی

قارداشین تانمور اوردا خان باجی 

دونوب یار یارینا باخمور قیقاجی

اداسیز عشوسیز جیران یاتبدی

 

تپراق التندا گوردوم من آیرلمازی

گلیب گتمگینه حیران یاتبدی 

 

 

آيریلماز

 

 

شعر ترکی

چوخ گوزل لر گوردوم آختاردیم بوتون دونیانی من

تاپمادیم عالمده ائوز کونلوم سئون جانانی من

بینوا پروانه لرتک یتمه دیم مقصودیمه

عشق سوداسیلا یاندیردیم بوشیرین جانی من

نازنین آهو باخیشلی چوخ پریلر گورموشم

سئومدیم ائوز سوگیلیمدن باشقا بیر جیرانی من

بولبول نالانی ام من بیر گول اوزلی دیلبرین

نینیرم هرلاله اوزلی غنچه ی خندانی من

هرگولون بیر عطری وار غنچه نین بیر نعشه  سی

اولموشام چوخ نازنین لر باغینین باغبانی من

شعرترکی

منی هیجرانه سالانلار دوشه هیجران اودونا

نئجه کونلوم کی یانیر حسرت جانان اودونا

قلبیم ای گول گئجه گوندوز آلیشیر عشقینده

نه اولار سنده اونون بیرجه دفعه یان اودونا

بیرجه جان سالیقی دیر ملک دونیایه دیه ر

جهد ایله دوشمیه سن شهرتیله شان اودونا

هرجوره فتنه فساددان چالیشیب آیری دولان

دهریده یانمیاسان سن شر شیطان اودونا

آیاغا دور تبریزیم...!

بوگؤروشو درده  درمان بیلمیشدیم

حسرتیندن چوخ آغلاییب گولموشدوم                  

 گؤوروشونه بیر قیش گونو گلمیشدیم

ِای قار آلتیندا اؤره یی یاز تبریزیم

چؤرگی بول، قسمتی آز تبریزیم.

 

چیچکلندین،باهار بیلدیم قیشینی

کؤکسون سیخدین،جانلی ساندیم داشینی

قارلا یودوم،گیزله دیم گؤز یاشینی

ایش اوستا سی،سؤز بئجری تبریزیم

گؤز یاشینا اؤیرنجه لی تبریزیم.

 

دالغاییدین عمانینا قووشدون

زواریدن کروانینا قووشدون

آزادلیغا، گومانینا قووشدون

آزادلیغین ایلک سنگری تبریزیم

تاریخ لرین شاه اثری تبریزیم.

 

نه گؤزله دی ؟نه آختاردی ؟نه بولدو ؟

نه بولدونسا اؤره یییمه  قبول دو!

بو سویوخلوق نه زاماندان دب اولدو؟

اولادینی قوناق بیلن تبریزیم

دردینه ده  دییب گولن تبریزیم.

 

قدرتینه شک ایلیه بیلمه دیم

قوجا ارکَه  ارک ایلیه بیلمدیم

نه یاتیرسان  درک ایلیه بیلمدیم

ای دونیانی یولا سالان تبریزیم 

ای کروان دان دالا قالان تبریزیم.

 

جنتینی سنده تاپان چوخ ایدی

سؤزون وارسا داشدان کئچن اوخ ایدی

"نیویورک"لار"لوندورا"لار یوخ ایدی

اؤز یئرینده سایین دوران تبریزیم

نوکرلره بویون بوران تبریزیم.

 

قیلینجا یوخ یاغلی سؤزه اییلدین

دوشمنه یوخ دوست  قارداشا دؤیولدون

 تاریخ بویو بئله مظلوم دییلدین

اومید بورجوم ،ظفر طاقیم تبریزیم

گولله دئیمیش سؤز بایراقیم تبریزم.

 

باکی سندن سن باکی دان اوممادا

دونوق قانلار اؤزگه دن  قان اوممادا

اومید یوخدو بو دونیادان اوممادا

یخیق کؤنلوم، سن اؤزون قور تبریزیم

زامان گئدیر، آیاغا دور تبریزیم.

       "رستم خانلی"

... سن سوگیلیم ...

سوگیلیم عشقینده یاندیم بیلمه دین

قلبیمی اوتلارا سالدیم بیلمه دین

سالدین منی دیلدن دیله

مجنون کیمی ائلدن ائله

گوز یاشلاریم سئلدن سئله   سن سوگیلیم

سوگیلیم من سنی چوخدان سئومیشم

ئورگیمی سنه چوخدان ورمیشم

سالدین منی دیلدن دیله

مجنون کیمی ائلدن ائله

گوز یاشلاریم سئلدن سئله   سن سوگیلیم

ندن اولدی

كوسدی ياريم نه بيليم كوسمگی مندن ندن اولدی

بلبولون شكوه سی خاراوسته بيتن غنچه دن اولدی

چوخ تمنا ايله ديم بلكه جفانون داشين آتسین

اودا سيندردی منيم قلبيميی چون شيشه دن اولدی

هر چالاندا مژه سين بيربيرينه اوخ سپه لندی

سينه مون ياره سينون هربيری بيرگوشه دن اولدي

گر دوشيدی اوجفا داغلارا داغلار داغلاردی

او ستملر كی منه يار جفا پيشه دن اولدی

منده پروانه كيمين دوشدوم اونون عشقينه يانديم

هامی بيلسون بو عطش خامييه انديشه دن اولدی

يازيقام وورما وفا ريشه سي نه تيشه نی هر دم

قوريان گوللريمون ريشه سی بير تيشه دن اولدی

اوجفا دن نه دئيم دوتدی چوروتدی منی صادق

او تنومند اغاجون آفتی چون ريشه دن اولدی

آیریلیق

فیکریندن گئجه لر یاتا بیلمیرم
بو فیکری باشیمدان آتا بیلمیرم
نئیله ییم که سنه چاتا بیلمیرم
آیریلیق، آیریلیق، آمان آیریلیق
هر بیر دردن اولار یامان آیریلیق

اوزوندور هیجرینده قارا گئجه لر
بیلمیرم من گئدیم هارا گئجه لر
ووروبدور قلبیمه یارا گئجه لر
آیریلیق، آیریلیق، آمان آیریلیق
هر بیر دردن اولار یامان آیریلیق

یادیما دوشنده آلا گوزلرین
گویده اولدوزلاردان آلام خبرین
نئیله ییم کسیبدیر مندن نظرین
آیریلیق، آیریلیق، آمان آیریلیق
هر بیر دردن اولار یامان آیریلیق

آیریلیق دردینی چکمه ین بیلمز
یاردان آیری دوشن گوز یاشین سیلمز
دئییرلر اینتظار خسته سی اؤلمز
آیریلیق، آیریلیق، آمان آیریلیق
هر بیر دردن اولار یامان آیریلیق

نئجه کی ائلیمدن آیری دوشندن
سورار بیربیرینی گوروب بیلندن
حسرتله سیزلار یار داییم بو غمدن
آیریلیق، آیریلیق، آمان آیریلیق
هر بیر دردن اولار یامان آیریلیق

ایل لردی اوزاقام آرخام ائلیم دن
بلبلم دوشموشم آیری گولوم دن
جور ایله آییریب شیرین دیلیم دن
آیریلیق، آیریلیق، آمان آیریلیق
هر بیر دردن اولار یامان آیریلیق

اولوبدور بیگانه یاریم_ یولداشیم
غریبه ساییلیر سئوگیم – سیرداشیم
بوجاوان چاقیمدا آغاردیب باشیم
آیریلیق، آیریلیق، آمان آیریلیق
هر بیر دردن اولار یامان آیریلیق

منی آغلاداندان گولوش ایسته رم
آیری دوشنیمله گوروش ایسته رم
حصاری ییخماقا یوروش ایسته رم
آیریلیق، آیریلیق، آمان آیریلیق
هر بیر دردن اولار یامان آیریلیق

سئوگیلیک اولوبدور شانی فرهادین
سئوگی سی هاردادیر، هانی فرهادین
دییه ره ک چیخاجاق جانی فرهادین
آیریلیق، آیریلیق، آمان آیریلیق
هر بیر دردن اولار یامان آیریلیق

نه ورمیسن منه دونیا ...

باغچا سالدیم بار ورمه دین

سئوگی وردین یار ورمه دین

کور گوزومه نور ورمه دین

نه ورمیسن منه دونیــــــــــا

 

آغیـــــــــــز وردین   سئــــــــــوز ورمه دین

چغـــــــــــــیر وردین ایـــــــــــــز ورمه دین

طـــــــــــــاقت وردین  دیز ورمه دین

نه ورمیسن منه دونیــــــــــــــــــــــا

 

یالان وردین حق ورمه دین

 تاجی وردین  تخت ورمه دین

سن بوجانا بخت ورمه مدین

نه ورمیسن منه دونیـــــــــــــا

 

آغیـــــــــــز وردین   سئــــــــــوز ورمه دین

چغـــــــــــــیر وردین ایـــــــــــــز ورمه دین

طـــــــــــــاقت وردین  دیز ورمه دین

نه ورمیسن منه دونیــــــــــــــــــــــا ؟؟؟؟؟؟

... بس ندی ؟

آرزولاریم  دیلک لریم سنه یوزدی " سنه مین

یاناقلارین نم گورمه سین سنین کیمین صنمین

یولچوسن اول"یول من اولوم گئچ اوستوندن سینه مین

اوزاغلقین مندن اوتور هیجران دئیر بس ندی ؟

 

گوزل لیغین  گوزلریمین قاراسیدی آغیدی

ائورگیمده مجنون لوقون زیله قالخان چاغیدی

لپه لر وار ساحیل لری دویور دیدیر داغیدیر

وارلیغیمدا بوش قالدیران طوفان دئیر بس ندی ؟

 

باخیشین لا باخیشیما اوخشا اینجه سوینجه

گوز دیمه سین  گوزلرینده گوللر آچان سوینجه

بئله وورقون باخماغیمی گناه سایما بو گنجه

گونه باخان  آغ گونشه حیران دئیر بس ندی ؟

 

عوضیمده هرکیم اولسا یاشماقدان بئزردی

کئوزکئوزاولدی دویقولاریم کئوزکئوزاولدی کئوزردی

داش اولسایدی عومور بویی حسرتینه دئوزردی

عریمزمی بو ظلیم خان انسان دئیر بس ندی ؟

 

سو"دئییبدیر منه اولده،آنام آب کی،یوخ

سو"دئییبدیر منه اولده،آنام آب کی،یوخ

                                    "یوخو"اویرتدی اوشاقلیقدامنه،خواب کی،یوخ

ایلک دفعه کی،"چورک"وئردی منه نان دئمه دی

                                     ازلیندن منه "دوزدانه"، نمکدان  دئمه دی

آنام ،اختر دئمه یبدیرمنه،"اولدوز "دئییب او

                                     سو دوناندا،دئمه ییب یخدی بالا،"بوز"دئییب او

"قار" دئییب ،برف دئمه ییب،دست دئمه ییب"ال"دئییب او

                                    منه هئچواخت بیا سویله مه ییب،"گل"دئییب او

یاخشی خاطیرلاییرام،یاز گونو اخشام چاغی لار

                                     باغچانین گون باتانیندا کی،ایلیق گون یاییلار

گل:-دئیه ردی،-داراییم باشیوی ای نازلی بالام!

                                     گلمه سن گر،باجیوین آستاجا زولفون دارارام

او دئمه زدی کی ،-بیا شانه زنم بر سر تو

                                    گر نیایی بزنم شانه سر خواهر تو

بلی،داش یاغسادا گویدن،سن او سان من ده بویام

                                  وار سنین باشقا آنان،واردی منیم باشقا آنام

اوزومه مخصوص اولان باشقا ائلیم واردی منیم

                                 ائلیمه مخصوص اولان باشقا دیلیم واردی منیم

ایسته سن قارداش اولاق،بیر یاشایاق،بیرلیک ائدک

                                  وئریبن قول-قولا،بوندان سورا بیر یولدا گئدک

اولا،اوزگه کولک لرله گرک آخمایاسان 

                                  ثانیا،وارلیغیما،خالقیما خور باخمایاسان

یوخسا گر زور دئیه سن ملتیمی خوار ائده سن

                                   گون گلر،صفحه چونر،مجبور اولارسان گئده سن

دکتر زهتابی

ترکی شعر

وفالی چیرکینه جان قوربان ائیله

وفاسیز گوزلین دوشمه دالینجا

قوی سنی ائولدورسن غیرتلی دوشمن

تعصب سیز  قوهوما دالدالانینجا

عبس یره چالما میخ  گئتمز داشا

چتیندی دئوز گئدن یولوندان چاشا

سوبای قال دونیادا آروادسیز یاشا

غیرت سیز کیشینین قیزین آلینجا

زیارت ائتمه یه  کعبه گوزلدیر

انسان چاتسا بو مطلبه گوزلدیر

سونسوز لوغون مین مرتبه گوزلدیر

به یار قیزبن به فرا اوغلون اولونجا

عومور امانت دیر "مناف " بیل گیلن

چالیش یاخشی لارینان الفت گیل گیلن

ال اوزات بو دونیادا ییخیل اول گیلن

منت آلت دا  دانناخ آلت دا  قالینجا 

 

آنالار

یازیم کمدی قیشمدان  

بیزه بشیک باشیندان

آنالار قوربان اولور

گوزلری دولا دولا

یاناغی سولا سولا

بالاسی گلن یولا   آنالار قوربان اولور

 

شعر ترکی

دوست دوست اولسا؛هرآرخالی نادانین

گووزو اوسته قاش اولماغا نه وار کی؟

ویجدان سوس سا ؛یانار اوودون کوزونده

یانایانا کئوز اولماغا نه وار کی؟

ائو تیکمه دیک بوزقامیشدان ،قارغیدان

پای اووممادیق طورآغایدان قارغادان

اوتانماسان قیزیل قوش دان ،قیرغی دان

تویوق کیمی قوش اولماغا نه وارکی؟

ال  سووینر  اکدیگینی بیچنده

دیل سووینر مردلیک آندی ایچنده

باش سیز یرده، باش سیزلارین ایچینده

باشا چیخیب باش اولماغا نه یوار کی؟

*-*-*-*-*-*-*-*-*-*-*-*-*-*-*

 بوگون ایله بیلکی تانیمیر منی

دونن آدام بیلیب ال وردیکلریم

ائوزوموزدن ایراخ دانیر منی

یالان آیاغینا نال وردیکلریم

کیمینه دوست اولدوم قهر گتیردی

ددیم چینیمده گئز   یه هر گتیردی

الیله سفره مه زهر گتیردی

الیمله آغزینا بال وردیکلریم

کیمینه دوست اولدوم   کیمینه آتا

قویمادیم دار گونده او  ایته باتا

اینانمازدیم منی ماناتا ساتا

الیمله الینه پول وردیکلریم

قانانا چکه سن   زحمت چکنده

قانمازدا  ایتمیه بیرجه تیکه نده

گوره سن یولوما تیکان اکنده

خجالت چکیرمی گول وردیکلریم!؟

بهمن وطن اوغلی

گئتمک ایسته ییرسن ....

گئتمک ایسته ییرسن، بهانه سیز گئت،

اویاتما مورگولو خاطیره لری،

سسین همین سس دیر، باخیشین اؤگئی،

گئدیرسن، سسین ده یاد اولسون باری...

ادامه نوشته

هئچ بیلمیرم !

گونلوم منی هانسی سمته چکیب دیر

منده اونون قاراسینا دوشمومشم

عشق عالمی  نه حدودسوز  عالم میش

هچ بیلمیرم اونون هاراسینا دوشموشم

 

نه خوشبخت دیر ایلقاریندا دوز اولان 

عشق اودوندان کونلی یانیق کئوز اولان

سینه سینده محبته سئوز اولان

عاشیقلرین سیراسینا دوشموشم

 

نه بوش یئره هارای سالیب دینه نم

نه شمع کیمی یانایانا  سونه نم

نه کرم تک عشقیدن کئوله دونه نم

نه مجنون هاواسینا دوشموشم

 

رشیدم من"  قلبیم باشی اودلانار

ئورگیمده محبتدن آتش وار

ائوزوم دوشوب احوالیمی گوزل یازمیشام

اودیله والله سو آراسینا دوشموشم

" بایاتی "

من عاشیقم گنجه دن                  آتین یه سین یونجا دان

سئویب آلا بیلمه سن                 بئلین سن سین اینجه دن

عشقین آسمانندا

 

من سنین عشقینین آسمانیندا آیاقلارا چاتماق ایسترم

مین بیر سعادتی بویون باغی تک من سنین بوینووا آتماق ایسترم

بیر سن "بیر من اولوم بیر اوچول کاها 

 هچ نه ایستمیرم طالعدن داها

بوتون کدرینی آلیب چوخ باها 

  سوینجی هاوایی ساتماق ایسترم

یاشائیم یوز ایلده " مین ده "

حیاتیم بیته جک همن او گونده

سنین گوزلرینین درینلیغینده

بوغولماق ایسترم  باتماق ایسترم

ریاکار اینسان !

دوشوب ناله ی ظلم داغدان داغا

علی ذوالفقاری دوشوب توپراغا

...

ادامه نوشته

نه اوچون ....

نه اوچون حسنونه ای گول بئله مغرور اولدون؟

بی وفالیق دا بوتون عالمه مشهور اولدون.

نییه اوز عاشیقینی بونجا نظردن سالدین,

کیم لر اورگتدی سنی,یا نییه مجبور اولدون.

بسله دیم زحمت ایله غنچه زامانیندا سنی,

نییه گول تک آچیلیب ,غیرایله مسرور اولدون.

توتدون اغیاری,منی هیجر اودونا یاندیردین,

سنه بیگانه اولان کس لر له نیه جور اولدون.

اوزگه لر مجلسینی گون تک ایشیقلاندیردین,

بیزه یئتدیکده نه تئزکن بئله بی نور اولدون؟

وئردین اغیاره نیشان جمله گوزه للیک لرینی,

زولف ایله واحیدی گورجک نیه مسطور اولدون.

دیل ...

*عقیل آذردخت

دیل وارلیق هویتدی بونی دویمالییق بیز 
ناموسدی بلی, ناموسا جان وئر‌ملییق بیز 
رنگین دئیشیب دیل ساتانین ارزشی اولماز 
بنزر كسیلن بیر خولا دای كؤك سالا بیلمز 
هر كیمسه دیلین آتسا دینینده آتاجاقدیر 
ناموسسوز اولوب خوار اولاجاقدیر , باتاجاقدیر 
دیل ناموسوم ائل غیرتیم اولكم شرفیمدیر 
هر تك تكینه وئرمگه جانیم هدفیمدیر 
      

پالید دا بار وریر     باری یه ییلمیر

یازیغ او سرچه کی  واری یه ییلمیر

هر قوری وجودا  انسان دئیلمیر

انسان اولماقا

قاناسان گره ک

شیرین یوخو

شیرین یوخون اولایدیم

گوزلرینه دولایدیم

سنه لای لای چالایدیم

سن گئجه لر یاتاندا

قیزیل گولون دریدیم دریدیم دریدیم

سنه چلنگ هوریدیم هوریدیم هوریدیم

یوخولارا گیریدیم

سن گئجه لر یاتاندا

کاش آرزوما چاتایدیم

غم غصه نی آتایدیم

سنن شیرین یاتایدیم

سن گجه لر یاتاندا

قیزیل گولون دریدیم دریدیم دریدیم

سنه چلنگ هوریدیم هوریدیم هوریدیم

یوخولارا گیریدیم

سن گئجه لر یاتاندا         سن گئجه لر یاتاندا

چلنگ(حلقه ای از گل درست می شود)

سنسیز لمیشم !!!!!!!!!

بیر گویرچین کیمی دنسیز له میشم 

 بولبولم ، یازدا چمنسیز له میشم

اسکی دن شانلی شرفلی ائل ایدیم

ظالیمه قارشی آمانسیز سئل ایدیم

ذیروه سی چنلی دومانلی بئل ایدیم

ایندی مدت دی کی چن سیز له میشم

دردیمین یوخ آدی عنوانی دئسم

حیرته دالدیرار انسانی دئسم

باشقا سوزلرله بو معنانی دئسم

اوز دیاریمدا وطنسیز له میشم

درد منی یاندیریر ،آمما آدی یوخ

دئییرم من بئله منسیز له میشم

ای منیم من لیگیم ، ایمدادیما یئت

بیرجه گل ،منله گوروش ، دادیما یئت

منی باس باغرینا ، فریادیما یئت

بیلمیسن کی نئجه سنسیز له میشم

گرچه عشق اهلی ایچر باده نی جان ساغلیقینا

ایچرم جام شرابی یارادان ساغلیقینا

ایچرم سل ده سارا داغدا چوبان ساغلیقینا

ایچرم مین گول ایچینده تیکان ساغلیقینا

جوانی آیریلیق آخیرده قوجالدار بیلیرم

ایچیرم بیر قوجا شیکلینده جوان ساغلیقینا

 

تایسزام !!!!

تانيميرسان مني سن ؟

 

گئت مني ، داغداكي داشدان خبر آل

 

مني آيري، ساليب آنلين يازيسي،

 

                                       داغلاردان

 

من اوجا داغلارين اؤ

               

                         پارچالانان سيرداشييام

 

باخما ايندي جوان اوغلانلارا من ،

 

                                          باش داشييام

ساوالانين داشييام؛

 

يادا گل

 

كيمليگيمي

 

              گؤزده كي ياشدان خبر آل

 

من اؤ صحرالري آباد ائلييه ن گؤز ياشييام

 

من آراز قارداشييام

 

چيرپينير ائل غمي هي، سينه م ايچره دالغالانير

 

سينديرير سدلري بيرده ن

 

                               كاغاذ اوسته جالانير

 

بيت لر بير بيرين اوسته قالانير

 

من اؤ ديللرده قالان شهريارين، يولداشييام 

 

" تايسيزام"

 

من بير آز اوندان ناشييام .

داغـــــــــــــلی گویلوم!!!!!!!

آغیر اؤلوب یامان داشیم

دیلیمد ه ن آغری یر باشیم

چیخاردیر گؤزومو قاشیم

باخ ائی دونیامیزا باخ ائی

*********************

اؤزومونکو اؤلوب اؤزگه

اؤزلویونه اؤلوب په زگه

قارا تئلیم اؤلوب گیزگه

باخ ائی دونیامیزا باخ ائی

*********************

زامان ائیؤلوب لاپ اؤیونجوق

ارککله نیر منه قانجیق

"داغلی گویلوم" اؤلور خینجیق

باخ ائی دونیامیزا باخ ا

آمان آیریلیق ، آمان آیریلیق

بیزی یاندیریر ، یامان آیریلیق                    بو داریخدیران دومان آیریلیق
باشا ساووریر سامان آیریلیق                      آمان آیریلیق ، آمان آیریلیق

بیر گؤزون آچار ، بیر گؤزون یومار                      آرازی سرین گؤردیکده اومار
خزری درین گؤردوکجه جومار                    قان دریاسینا جومان آیریلیق

                             آمان آیریلیق ، آمان آیریلیق

آرازیم وورسون باش ، داشدان داشا                    گؤز یاشی گرک باشلاردان آشا
نئجه یاد اولسون ، قارداش - قارداشا                        نه دین قانیر ، نه ایمان آیریلیق

                             آمان آیریلیق ، آمان آیریلیق

گؤیلرین ، گونون - آیین گیزلدیر                      اولدوز آخدیریر ، سایین گیزله دیر
اوخونی آتیر ، یایین گیزلدیر                         قدیمی ائدیب کمان آیریلیق

                             آمان آیریلیق ، آمان آیریلیق

آیریلیق گله ، بیر کرم قیلا                         بیر نئچه گون ده ، بیزدن آیریلا
غم ده بیز تک سووا ساوریلا                          هانی بیر بئله گومان آیریلیق
                             آمان آیریلیق ، آمان آیریلیق

دئدیم آیریلیق ، قیناما منی                          سنی گؤرموشم ائللر دشمنی
یوزمین کره ده سیناسام سنی                         همان آیریلیق ، همان آیریلیق

                             آمان آیریلیق ، آمان آیریلیق

آمانسیز گؤزون یومان آیریلیق                         جان جیزلیغیندان اومان آیریلیق
نه غملی یازار (دومان) آیریلیق                          دیللره سالان دومان آیریلیق

                             آمان آیریلیق ، آمان آیریلیق

سن اونودسان دا(سلیمان) منی                          اونودمیاجاق «شهریار» سنی
یاز گله ر ،بولبول قاپسار چمنی                        ایندی لیک سه وسون زمان آیریلیق

                             آمان آیریلیق ، آمان آیریلیق