سحرخانیم/الینی وئرمنه

ائليمين گوللري سولمايان كيمي

دريالار  اوسگويه دولمايان كيمي

توتولوب اولمايان كيمي

اوچماقدير ديلگيم قانات وئر منه

 

غم توزون آپارمير گؤزومون سئلي

سوسدوروب ديليمي ننه ليك فئلي

درديمي توكنمز حيات وئر منه

 

چال سازي ، سسينده سؤزومو دئييم

قال رنگين گؤسترمز دونومو گئييم

واردير چارپيشماغا  هله ليك هئييم

گئديرم چنلي يول، قيرآت وئر منه

 

جانيملا وارليغيم، واريم ديديشير

اوخ قاليب سوموكده  يارا بيتيشير

حياتيم بوش-بوشا  باشا يئتيشير

بوسون گونلريمده ثبات وئرمنه

 

قولوما قارداشدان داياق ايستيرم

ديليمه ائليمدن ساياق ايستيرم

دنيزلر توتوملو  چاناق ايستيرم

درديمي يازماغا داوات وئر منه

 

سحرخانيم

 

سحرخانیم/هانسی یوللاردان گلیرسن...

 

سيغمايير ايستـكلريم منطقلرين اركانينا

ايسته يير  عنوان اولوم ديوانه لر ديوانينا

سن آچان گونــدن قاپانميش يوللاري رؤيالره

مين ديلك ايلمك له نير هردم كونول دامانينا

هانسي يوللاردان گليرسن گؤيده اولدوزلار گولور

چن دوشور حسرت قباسيندان باخيش ميـدانينا

سن دوننلر باغــچاسيندا اكديگيم بير آرزوسان

گئج بئجردين دوشمدي كؤلگن گؤروش ايوانينا

دامجي-دامجي قان داميركن، قلبيمين پيمانه سي

دالـــغا-دالـــغا يوكســلير ميــدان وئرير طوفـانيـــــنا

قوي اؤره ك درياي عشق اولسون،بوتون وارليق كيمي

قــــوي چئويرسين  دالغـــالار دونيـــاني قان عمــــانينا

 

سحرخانيم

سحرخانیم/آند ایچیرم...

 

دالغالي گؤللرينه آند ايچيرم

دامغالي اللرينه آند ايچيرم

 

قويماريق باغلي قالا قوللاريميز

قورويا گول-بوتاغيميز ، خوللاريميز

يئته دوستاق ديبينه يوللاريميز

باغلانان قوللارينا آند ايچيرم

كسيلن يوللارينا آند ايچيرم

 

قويماريق آل گونشين رنگي سولا

قورخولوق يوردوموزا كؤلگه سالا

چن توتا  آرزو يولون ، گؤز قارالا

آغاران تئللرينه آند ايچيرم

چن توتان بئللرينه آند ايچيرم

 

قويماريق غم دنيزي داغالانا

گتيره تولكو فئلي خلقي جانا

اودوموز  اؤزگه اوجاغيندا يانا

سارالان گوللرينه آند ايچيرم

ساري بولبوللرينه آند ايچيرم

 

يازاريق قوچ نبي نين  شانلي سؤزون

چالاريق سازدا ائلين جانلي سؤزون

دوياريق خان آرازين قانلي سؤزون

سارالي سئللرينه آند ايچيرم

يارالي ائل لرينه  آند ايچيرم

 

 

سحرخانيم

سحر خانيم/غم پنجه سي چالماقدادير

 

 

حسرت ياش اولوب گوزللره دولماقدادي،داي گل!

گوزياشلاري آخماقدا سئل اولماقدادي،داي گل!

هجران توري دونياني قفس تك بورويوبدور

 دنياكيمي ،باغريمدا دارالماقدادي،داي گل!

 سال داغلارا هاي،گؤيده بولودلار ديله گلسين

 ياپراق كيمي وارليق بويو سولماقدادي،داي گل!

 هجرينده گئچن لحظه لري يانقلي سازتك

 غم پنجه سي،آه زخمه سي،چالماقدادي،داي گل!

 سنسيزليگه دؤزمك نه ساياق ممكن اولارميش

 دؤزودوم،دؤزوموم جانيمي آلماقدادي،داي گل!

 گل قوي گؤنشين بايداسي دنيايه جالانسين

 باغريمدا قارانليق ايزي قالماقدادي،داي گل!

 ياتماز، يولونو گؤزلريم اولدوزكيمي گؤزلر

 گؤزلر كؤكو، حسرتله سارالماقدادي،داي گل!

 هرگؤن “سحر” آدديملارينين ماهنيسين ايزلر

 چميش سحرين باغري قارالماقدادي،داي گل!

 

سحر خانيم