سیدعظیم شیروانی / ای بادصبا

گذرین دوشسه در دلبره، ای باد صبا،
یئتیر عرضیم او گول احمره، ای باد صبا

گول جعفر کیمی رنگیم سارالیب فرقتدن،
دئ بو حالی او گول جعفره، ای بادی صبا

تلخکام اولدوغومو زهر غم هجریندن،
عرض حال ائت او لب شکّره، ای باد صبا

تابیدن سالدی کتان تک بو دل بیتابی،
نئیلمیشدیم او مه انوره، ای باد صبا؟

پیکریم پیکر جوزا کیمی، گؤر، اولدو دو نیم،
وئر خبر اول بت مه پیکره، ای باد صبا

بو قارا گون کی، منیم باشیما هجرینده گلیب،
حق نصیب ائیله مه سین کافره، ای باد صبا

لاله تک داغ دل سینۀ سوزانیمی گؤر،
وئر خبر سونبول و سوسن بره، ای باد صبا

بو محمد ائله دی سیّد بی عاری هلاک،
عرض قیل روضۀ پیغمبره، ای باد صبا

ائل آراسیندا

اینسان اولان پیسه یاخشی سویله مز

چکیلسه ده دارا ائل آراسیندا

پالید کیمی کولک قارشیندا دورار

قایا تک دایانار سئل آراسیندا

یایای دوز گََُونلویو دوغما ائلینده

حقٌه آرخا اولار دوز سوز دیلینده

ایگید بابک کیمی شـمشیر الینده

های سالار موغانلا میل آراسیندا

ایشیق ساچار یوردا بیر اوجاغ کیمی

سو وئرر سوسوزا بیر بولاق کیمی

یارار سینه سینی بیر داراق کیمی

چاتا یارا قالا تئل آراسیندا

ایلانلار گوزونه اودلار سالـماغا

دونیا بویو آدی دیری قالـماغا

یازیق کوتله لرین حقٌین آلـماغا

قالـخار داغا یاشار بئل آراسیندا

قیزیل قفس ، اوچار قوشا زینداندی

قفسده بولبولون اورگی قاندی

آجی آغریسینا شیرین درماندی

سانـجیلا تیکاننا گول آراسیندا

ال اوزر جانیندان سوز وئرمز یادا

اینسانلیغی ساتـماز شوهرته آدا

 سیــد  کیمی اودا داغلی دونیادا

چاغیرار آزادلیق ائل آراسیندا  

پری لر خط و خالین ...

ال چاتسا فدا جانیمی جانانه ائدردیم
شمع روخونه کؤنلومو پروانه ائدردیم

ای زاهد بی ذوق بو مسجید کی، سنین وار
اولسایدی منیم، من اونو میخانه ائدردیم

مینبر عوضی اوندا قویاردیم خوم باده
وقف اول خوم اوچون بیر نئچه پیمانه ائدردیم

بیر تاره دوزردیم نئچه یوز دانۀ انگور
آنی عوض صبحۀ صد دانه ائدردیم

مئی دن اؤتورو اکمک اوچون تاک یئرینده
هر یئرده کی، وار مدره سه ویرانه ائدردیم

دوشسیدی نهانی الیمه بچّۀ زاهد
هئچ اوندا بیلیرسنمی کی، آیا، نه ائدردیم

سیّد تک ائدیب وصف پری لر خط و خالین
بو وضع ایله عالم لری دیوانه ائدردیم

کونلوم سنی ایستر

 يوز سرو خورامان اولا كونلوم سني ايستر

    يوز باغ و گلستان اولا كونلوم سني ايستر

يوز زهره تكين ماه ليقا مهر دل آرا

     يوز مين مه تابان اولا كونلوم سني ايستر

 بو ظلمت زولفونده لبين آب بقادير

   يوز چشمه ي حيوان اولا كونلوم سني ايستر

اي خوبلارين شاهي كونولدور سنه طاليب

      عالم هامي خوبان اولا كونلوم سني ايستر

اي دوست بيزه حوري و قيلمان نه گرك دير

      يوز حوري و قيلمان اولا كونلوم سني ايستر

سيد ! دئگيلن بند اولام هر بير گوله آلا

      يوز غنچه ي خندان اولا كونلوم سني ايستر

وفاسیندان

نه مجنونام كی وحشت ائيله يم ليلا جفاسيندان

دوشم صحرايا سرگردان غم عشقين بلاسيندان

نه فرهادام كی داغلاردا وورام اوز باشيما تيشه

قوتارماقچين بو شيرين جانيمی هيجران بلاسيندان

وطنده جورو جانان خوشدور ، غربت ايچره راحتدن

خداوندا قورتارما منی جانان جفاسيندان

كولاهيندان چيخارتديم كاكيلين يالوارا يالوارا

ايلاني آری شيرين ديل چيخاردار اوز يوواسيندان

سگ كوی حبيبيمله قديمی آشنادير دل

خداوندا آييرما آشنانی آشناشيندان

گلير يانيما غير ايله نگاريم حال سورماقچين

منه بالله خوشدور يوز جفاسی بو وفاسيندان

دريغا گئتدی خاكا عرض حالی سينه ده سيد

بيانا چكمه دی اول شاها اوز شرم و حياسيندان

ایلدی آخیر فلک ...

ائیله دی آخر فلک اول گولعذاریمدان منی
سالدی دشت غربت ایچره کوی یاریمدان منی

ناقۀ سرگشته تک صحرا دولانسام، نئی عجب
کیم، فلک بیداد ایله اوزموش قاطاریمدان منی

هجردن رنگیم سارالدی، شکر کیم، صراف عشق
ایندی تانیر بو زر کامل عیاریمدان منی

قالدی، من گئتدیمسه، ای نامهربان، کویینده دل
باری گه گه سور دل بی اختیاریمدان منی

شهر تفلیسین چلیپا باغلایان ترسا لری
قورخورام کیم، آییرا آخردا تاریمدان منی

سیّدا، من اول محبت اهلییم آفاقده
کیم، تانیر اهل نظر خاک مزاریمدان منی

هر علته علت سن ...

ای تاری _ سری - زولفون" والیل اذا یغشا"
"والشمس" یوزون وصفین ذراته قیلیب انشا

ای مرشد -ی ناسوتی , وی سایر-ی لاهوتی
کیم اولمادی هم سیرین جبریل شب-ی اسرا

گون اولسا گئجه اولماز ,ای ماه,ندیر وچی
یلدای-ی سر-ی زولفون گون یوزده اولوب پیدا

سن جوهر,عرض عالم,سن اصل,طفیل آدم
هم علت-ی غائی سن,هم علته سن معبد

هر علته علت سن,سن باعث-ی خلقتسن
سن عین-ی مشیتسن,سن عالمه سن مولا

سن اول-و سن آخیر,سن ظاهر-و سن باطین
سن طیب-و سن طاهیر,سن صورته سن معنا

خورشید جمالیندان بیر ذره عیان اولدو
طور اوزره تجلاده-ن مبهوت قالیب موسی

"سید" نچیدیر ائتسین اوصاف سنی,ای شاه
ایظهار-ی خلوصیت ایله ر سنه اول شیدا.

آشفته لیگیم ... !!!

آشفته لیگیم زلف سیه تاری بیلیرمی؟
یا رب، گؤره سن درد دلیم تاری بیلیرمی؟

بیلمز، بیلیرم یار منیم سوز نهانیم،
طوفانه دؤنن گؤز یاشیمی، باری، بیلیرمی؟

گیرم بو گئجه قالدی گؤزوم یولدا، نه نفعی،
اول ماه اؤزو ائتدیگی اقراری بیلیرمی؟

گیرم کی، دؤگر باشینی سجاده یه زاهد،
ترساده اولان معنی زنّاری بیلیرمی؟

واعظ کی، دئیر مئی ایچنه اهل جهنم،
بیر مغفرت قادر غفاری بیلیرمی؟

عابد کی، ائدیر جنّت ایله کوثره رغبت،
میخانه ایله بادۀ گولناری بیلیرمی؟

سیّد کی، بیلیر اؤز اؤزونو مرفعت اهلی،
بیرجه سوروشون، فیض دهو چاری بیلیرمی؟

ائیله مه اوصاف علی دن غیری،

شمع کیم، روشن اولوب یانماغا پروانه اوچون،
یانماغیندان دخی پروانه یه پروا نه اوچون؟

وئرمییم خالوه ای گول، نیه من دنیانی،
چکدی جنّتدن ال آدم ائله بیر دانه اوچون

بیلمیرم زلفو اوچون شاننی خلق ائتدی خدا،
یا کی، زلف سیهین خلق ائله ییب شانه اوچون؟

بونجا کیم، حسنونو قرآنده وصف ائتدی خدا،
بیلمیشم کیم، ائله ییب مشق اونو میخانه اوچون

پیر میخانه علی دیر، اودور انوار جلی،
آشنانی تانی، سئیر ائیله مه بیگانه اوچون

اولماسایدی گیل آدمده جمالیندان اثر،
قابل اولمازدی اونون تینتی پیمانه اوچون

سیّدا، ائیله مه اوصاف علی دن غیری،
عمروی صرف ائلمه هر یئتن افسانه اوچون.