فضولی/آهیم اؤدو

قېلدې عشق اي خون دل! كويوندا چۏخ رسوا مني،

بير گئييم گئيدير تانېماسېنلار هئچ اۏردا مني

هم نشينيم بسدي كويوندا اۏلوبدور ايت رقيب،

آهيم اۏدو، يا اۏنو اؤلدورمه ليدير يا مني.

منزليم چئوريلدي گۆلخن اۏلدو گۆل يۆزدن ايراق،

عاقبت توپراغا سالدېردې يامان سودا مني.

قتليمه وعده وئريب، ائتمير وفا بير اۏ پري،

بو تغافل اؤلدۆرۆر بو گۆن و يا فردا مني

يار هر اۏباش اۆچۆن بير شمع محفل اۏلدو، واي!

غيرت اۏدو ياندېرېر واللهي، سرتاپا مني!

غم گئجه سي شمع ده بي كس ليڲيندن آغلايېر،

كيمسه سيزليك دردي اؤلدۆردۆ امان تنها مني.

عشق ذۏقون، اي فضولي! ترك ائتديم من داها،

نه بو دنياني من ائتديم شاد، نه دنيا مني.

 

فضولي

رسول رضا/ قیزیل اوزوک

اوزوگومون قاشي فيروزه دن  دير،

كونلوم آچيلمايير بو گون ندن دير؟

يامان گونده دوست اليندن برك ياپيش،

دونيانين هوسي كئچيب گئدن دير.

 

بيزيم باغلار، چؤللر خوش بير تاماشا،

سونالار گؤللرده  گزرلر قوشا.

نئجه چتين اولسا عؤمرون يوللاري

بيرليك ده، يورولماز  ووراريق باشا.

 

بولود گلر، چيسگين چيلر، چن ائيلر

يار ياريندان آيري دوشسه غم ائيلر.

سئوگيليمدن نئجه قاليم آيري؟!

بير باخيشلا قلبه يوز ملحم ائيلر.

 

 

رسول رضــا