توت الیمد‌ن آپارمنی تبریزه ....

 

 *عاشیق اولدوز

توت الیمد‌ن آپارمنی تبریزه .... 
 
قسمت اولوب بو گون قوناق گلمیشم ,  
 توت الیمدن آپار منی تبریزه 
بو گوروش, بو میثال گلمه‌سین بیزه  
توت الیمدن آپار منی تبریزه 

آیلا چیخیم گون‌له شفق ساچیم 
 دورنا كیمین ائلدن- ائله اوچوم 
ده ده شهریاردان صحبت آچیم
توت الیمدن آپار منی تبریزه 

لپه‌له نیم آرازی ایله آخیم من  
قارتال اولوم ساوالاندان باخیم من

هیجران قالاسینی سوكوم ییخیم من 
توت الیمدن آپار منی تبریزه 

عینی دیلده اؤتن دیللریمیز وار  
آراز لا بیر له‌شن سئللریمیز وار 
تبریز له باكی تك ائللریمیز وار 
توت الیمدن آپار منی تبریزه 

" اولــدوز" دیله‌ر هئچ‌كس ائلدن كؤچمه‌سین 
بیرجه قوش‌دا یووواسیندان اوچما‌سین 
اوغلوم, قیزیم یادلارا ال آچماسین 
توت الیمدن آپار منی تبریزه 

کویوندا دولانسام گئجه گوندوز

زولفونده نه لازیم ، گؤزلیم ، شانه دولانسین ؟

قویما او حرمخانه نی بیگانه دولانسین

عیب ایله مه ، کویوندا دولانسام گئجه گوندوز

شمعین گرک اطرافینه پروانه دولانسین

ساقی دولانیم باشینا مئی جامینی گزدیر

سرمست اولوم ، باشیما میخانه دولانسین

اول زولفه کؤنول وئرمه ، دییرلر منه ال چک

اونسوز نئجه بس بو دل دیوانه دولانسین

مجنون نه برابر منه صحرالره قاچدی

عشق اهلی اودور عرصه ده مردانه دولانسین

اغیار ایله اؤز یارینی همدم گؤرن عاشیق

دوشسون او گره ک دشت و بیابانه دولانسین

سرخوش لیق ایله عؤمرونی صرف ائیله مه  واحید

عارف اونا دییرلر کی ، حکیمانه دولانسین

حسنون اولدوقجا فزون

حسنون اولدوقجا فزون،عشق اهلی آرتیق زار اولور

حسن نه مقدار اولورسا، عشق اول مقدار اولور!

جنّت اوچون منع ائدن عاشقلری دیداردان

بیلمه‌میش کیم جنّتی عاشقلرین دیدار اولور

عشق دردیندن اولور عاشق مزاجی مستقیم

عاشقین دردینه درمان ائتسه‌لر بیمار اولور

زاهد بی‌خود نه بیلسین ذوقونو عشق اهلی‌نین؟

بیر عجب مئی‌دیر محبّت کیم ایچن، بیدار اولور!

عشق سئوداسینا صرف ائیلر فضولی عمرونو

بیلمزم بو خواب غفلتدن هاچان بیدار اولور؟

ستمله قان اولان کؤنلوم

گلوبدور تنگه ای ظالم ، ستمله قان اولان کؤنلوم

همیشه باغ وصلینده ، گولوب خندان اولان کؤنلوم

دوشوب مجنون کیمی ، صحرایه بیر لیلی فراقیندا

بوتون عاشقلر ایچره ، منبع عرفان اولان کؤنلوم

نه اولدو بیلمه دیم دوشدو ، جدا گولزار کویوندان

همیشه خوان وصلین بزمینه ، مهمان اولان کؤنلوم

کیمه بیلمم ، گئدیب اظهار قیلسین محنت عشقین

دؤنوبدور قانه هيجرینده غمی پنهان اولان کؤنلوم

نه چاره ائیله سین ، بیلمم خلاص ائتسین اؤزون غمدن

اسیر محنت و پا بسته هيجران اولان کؤنلوم

اولورمی بیر زمان خرم ، یئتیشسه وصل جانانه

غم هجرینله افغانلار چکیب ، گریان اولان کؤنلوم

منم فرهاد ! عصرین سئودیگی واحيد  گوزل لر دیر

اودور کی لاله داغین گؤستریر ، ویران اولان کؤنلوم

آذربایجان

آذربایجان زمان-زمان

دویان دگیل گؤزوم سندن

قان قانیندان، جان جانیندان

عمروم سندن، اؤزوم سندن

 

سن آرزومون چیچه یی سن

گؤزه لیم سن، گؤرچه ییم سن

سن الهامین اوره یی سن

مایالانیب سؤزوم سندن

 

سن ابدی شان- شهرتیم

آدیم سانیم، دیانتیم

كرم عشقیمة محبتیم

جان مندندیر دوزوم سندن

 

سن عمرومون باهار یازی

ائتمز طالع یازان یازی

آزافلی الینده سازی

دئیر دوزوم-دوزوم سندن

 

ایکی کور !!!

بیر کور تانیرام، گؤزو کورسادا، اؤزو کور دئییل

بعضن غم اودوندا قوورولسادا

عاغلینا حیسسینه، او نان کور دئییل

گئجه لی گوندوزلو یازیر اوخویور

عاغیلی گؤزویله او گؤرور، دویور

آنجاق بیری ده وار کور دئییل سه ده

گؤزو گؤرمور

دوستو گؤز اؤنونده اؤلدورولسه ده

گؤرمه دیم دئییر

یاخشی یااورتاقدیر یامانی گؤرمور

او ساعـاتا بـاخیر زامانی گؤرمور

فیــکرینی حیسسینی اوجادان دئـمه ز

بعضن گؤردویونو گؤرمه ک ایسته مه ز

گــؤزلری گؤرمــویه ن کور دئییل هـله

گؤرمه ک ایسته مییه ن کوردور، دئییرم

بئله موغــاویله بئـله جاهیله

حیاتین اؤزوره قوردور  دئییرم

اینسانلار ...

ثرادن بیر ده لی شیطان دئیر: اینسانلار، اینسانلار!

نه دیر دونیانی دوتموش علم لر، عیرفانلار، اینسانلار!

قانان کیم، قاندیران کیم، فیض یاب اولسا عوام الناس

دوشر شان و شرف دن ملالار، ایشانلار*، اینسانلار!

سئورمی اهل استبداد ملت هوشیار اولسون؟

بونا راضی اولورمو بیرنئچه وجدانلار، اینسانلار!

آییلمیش رنجبرلر، آلماق ایستر حق مشروعین

نه یئرده قالمیسیز بگلر، آغالار، خانلار، اینسانلار!

محررلر، مفتن لر اوسانمازلار، اوتانمازلار

بازارلار، هرزه لر، افسانه لر، هذیانلار، اینسانلار!

شرارت دن چکیب ال، خیره مایل اولمایین بیر دم

کسین باشلار، الین جانلار، تؤکون مین قانلار، اینسانلار!

بشر سیز، سیزده قان تؤکمک طبیعی در، جبلی دیر

بوفطرتدن اوزاقدیر، شبهه سیز، شیطانلار، اینسانلار؟

دگول میحیف دل لردن غبار جهل محو اولسون

نچون هرگونده قاندان قوپماسین طوفانلار... اینسانلار!

دمادم نفس اماره دئمکده اُقتل الاخوان

نچون سالم قالا باشلار، بدنلار، جانلار،اینسانلار!

جهالت پرده سین چاک ائتمه یین، اوندا گؤره ر سیز کیم

ثرادیر جسم لر، هم نفس لر، شیطانلار، اینسانلار!

*- ایشان: اوزبک و تاتار واعظلری

وقتی !!!

دئدیم: فــلک اینصـافا گل

دئدی: اوزوم بیــلن وقـتی

دئدیم:کونول بیرشاداول گل

دئدی: آغ گــون گلن وقتی

دئدیم: او گون ساچیلارمی؟

دئدی :حقدن قاچــیرارمی

دئدیم: عینیم آچــیلارمی

دئدی: دوسـلار گولن وقتی

آزافلی دا غم یامان دیر

دئدی:دردی آت آمـان دیر

دئدیم:بایرام نه زمان دیر

دئدی: ظالیم اولـــن وقتی

یئتمه دیم مقصودیما

چوخ گوزللر گوردوم آختاردیم بوتون دنیانی من

تاپمادیم  عالمده اوز کونلوم سئون جانانی من

بی نوا پروانه لر تک  یئتمه دیم مقصودیما

عشق سوداسیله یاندیردیم بو شیرین جانی من

نازنین ، آهو باخیشلی چوخ پری لر گورموشم

سئو یمه دیم  ائوز سئوگیلیمدن باشقا بیر جیرانی من

بولبول نالانی یم من بیر گول اوزلی دلبرین

نیلره م هر لاله اوزلی غنچه ی خندانی من

هر گولون بیر عطری وار هر غنچه نین بیر نشئه سی

اولموشام چوخ نازنین لر باغینین باغبانی من

وار امیدیم  وصل جانانه یئتیشسین تئز الیم

آهیله سوندوررم آخر ، آتش هجرانی من

 واحیدم  بیمار عشقم ، غیردن یوخ منتیم

دردیمه جانان الیله ائیله رم درمانی من

حرمت

اَلده اولســا اختيــــــيارين

ائله خلقــــه،‌ائله حــرمت

وئر پايينى گناهـــــكارين

ائتمه فتنه – فعله حرمت

 

ظاليــــــــم لرده مروت گزمه

آلچـــــاق لاردا غيرت گزمه

حرمت ائديب ،حرمت گزمه

تمنــــــــــاسيز ائله حرمت

 

آخماق قيشدا ياى آختارار

تنبل حاضير پاى آختارار

زايين اوغلو زاى آختارار

اينـــانما كى بيـــله حرمت

 

دوغرولارلا يئـر- گوى دولا

يولســـــــوزلارى چكه يولا

بودونيـــــــــــايا حاكم اولا

 دوشه ديلدن - ديله حرمت  

 

آزافلى ،‌چوخ بودن اؤتمه

اؤز يئريندن اوزاق گئتمه

حرمت سيزه حرمت ائتمه

اوندا دؤنر كوله حرمـــت 

ائل آراسیندا

اینسان اولان پیسه یاخشی سویله مز

چکیلسه ده دارا ائل آراسیندا

پالید کیمی کولک قارشیندا دورار

قایا تک دایانار سئل آراسیندا

یایای دوز گََُونلویو دوغما ائلینده

حقٌه آرخا اولار دوز سوز دیلینده

ایگید بابک کیمی شـمشیر الینده

های سالار موغانلا میل آراسیندا

ایشیق ساچار یوردا بیر اوجاغ کیمی

سو وئرر سوسوزا بیر بولاق کیمی

یارار سینه سینی بیر داراق کیمی

چاتا یارا قالا تئل آراسیندا

ایلانلار گوزونه اودلار سالـماغا

دونیا بویو آدی دیری قالـماغا

یازیق کوتله لرین حقٌین آلـماغا

قالـخار داغا یاشار بئل آراسیندا

قیزیل قفس ، اوچار قوشا زینداندی

قفسده بولبولون اورگی قاندی

آجی آغریسینا شیرین درماندی

سانـجیلا تیکاننا گول آراسیندا

ال اوزر جانیندان سوز وئرمز یادا

اینسانلیغی ساتـماز شوهرته آدا

 سیــد  کیمی اودا داغلی دونیادا

چاغیرار آزادلیق ائل آراسیندا