پالاز اولام يوخسول اوه سالينام
قيصاص اولام ظاليم لردن آلينام
بير ساز اولام مجليس لرده چالينام
اوندا شيرين اولار بو حيات منه
باهار اولام قيش قهريني چكنه
قووَت اولام خلقه روزي اكنه
مسلك اولام سينيق كونول تيكنه
اوندا شيرين اولار بو حيات منه
مژده اولام ايستكلي سي ايتنه
چشمه اولام سوسوز يرده بيتنه
چيراغ اولام ايشيق سالام وطنه
اوندا شيرين اولار بو حيات منه
بير اود اولام جهالتي يانديرام
قانماياني دوشوندورم قانديرام
يول هانسي دير اركان نه دير آنديرام
اوندا شيرين اولار بو حيات منه
گونش اولام هر نه بوز وار اريدم
بولبول اولام بايقوشلاري كيريدم
رياكارين عومرون گونون چورودم
اوندا شيرين اولار بو حيات منه
جاهاز اولام يتيم قيزا گلينه
عصا اولام قوجالارين الينه
داراق اولام باجيلارين تلينه
اوندا شيرين اولار بو حيات منه
فرهاد كيمي چاپام اوجا داغلاري
باهار اولام گوللنديرم باغلاري
بيرلشديرم قارالاري آغلاري
اوندا شيرين اولار بو حيات منه
آچار اولام قيفيل لانميش ديللره
مرهم اولام قابار چالان اللره
جانلا باشلا قوللوق ائدم ائللره
اوندا شيرين اولار بو حيات منه
يولداش اولام آرزوسونا چاتانا
اولوم اولام اوز يوردونو ساتانا
زندان اولام دوست آراسي قاتانا
اوندا شيرين اولار بو حيات منه
قانادلي قوش اولام گويلره اوچام
گجه لر آي اولام يره نور ساچام
بير نفر دمه يه چيلپاغام آجام
اوندا شيرين اولار بو حيات منه
جوهر اولام ائللر قانون يازالار
كولونگ اولام معدن لري قازالار
يايلاق اولام داريخانلار گزه لر
اوندا شيرين اولار بو حيات منه
قوناق گئده م اوزاق ائله اوبايا
ائللر مني بركده بوشدا سينايا
ياخشي اولسام پيس ده اولسام تانييا
اوندا شيرين اولار بو حيات منه
هر يرده وار اوچا ظولمون بناسي
سيلاح لارين باتا سسي صداسي
گوزل له شه يوردوموزون نماسي
اوندا شيرين اولار بو حيات منه
قويام خوشبخت ليگين تمل داشيني
آغلايان گوزلرين سيلم ياشيني
بُوز دومان آلماسا داغلار باشيني
اوندا شيرين اولار بو حيات منه
سليمان جودي (ثالث)
بیرعده سئوه ر جهاندا سئیر چمنی