سلیمان رستم/ایتیرسم آغلارام من !!!

 

ئوزومدن تئز  الهاميم قوجالسا ، آغلارام من

كونلوم خوش آرزولاردان بوشالسا ، آغلارام من

دوز يول سئچدي گنج ليگيم ،

اوددان  كئچدي گنج ليگيم ،

شعـــــره كوچدو گنج ليگيم ،

شعرلريمين ساچي آغارسا، آغلارام من

بهارينا ياغيش ، قار ياغسا ، آغلارام من

دار گونده آغلاماديم ،

سينه لر داغلاماديم ،

قارالار باغلاماديم ،

اليمده بير گون قلم آغلارسا، آغلارام من

كونوللره يولومو باغلارسا، آغلارام من

پوچدور  وقارسيز حيات ،

زحمت سيز، بارسيز حيات ،

هئچدير  بهارسيز حيات ،

نغمه لر  بهاريمي  ايتيرسم آغلارام من

الهام آدلي واريمي ايتيرسم آغلارام من

 

سليمان رستم

سلیمان رستم/سلیمان دردی

 

مني يانديردي  فضولي كيمي هجران دردي

اوزون ايللر دئمه ديم  خلقه بو پنهان دردي

 

عاشقم  عشقيمي گيزلتمگه حقيم يوخدور

همدميمدير  گئجه لر   سئوگيلي جانان دردي

 

ووردو  سولدوردو  خزان سئوگيليمين گلشنيني

داشيير  گور نئجه  قلبيمده بير عمان دردي!

 

عشقيمين  هرايكي ساحلده  دردين كوكلري وار

يوخ  دگيل  درديمه تاي  عشقده صنعان دردي

 

هارداسان  هاردا  خياليمداكي تبريزيلي  گوزل

تك سنين دردين اولوب ايندي سليمان دردي؟!

 

سليمان رستم

سليمان رستم/اورالييام من

 

ايللردير  اوزونه حسرت قالديغيم

دوغما قارداشيمدان آرالييام من

دوشمنيم ده بيلسين   دوستوم دا بيلسين

هله ئولمه-ميشم  يارالييام من.

هاردا الني آچيق انسان گورسه-نيز

هاردا اوركلرده  عصيان گورسه-نيز.

هاردا مكتبدن چوخ زندان گورسه-نيز

بيلين او يرلييه م   اورالييام من.

 

چوخداندير  توي-دويون گورمه ييب  اوبام

خرمنده ئوزگه يچون  ايش گورور يابام.

ستارخاندير آتام   بابكدير بابام

ايندي بيلدينيزمي  هارالييام من؟!

 

سليمان رستم

جانانی چاغیر

سنه اؤز وئرسه کدر ، مجلسه جانانی چاغیر

لبلری غونچه نی ، او ، گؤزلری جیرانی چاغیر

 

 

سوندوره بیلمیه جکسن ینه عشقین اودونو

ایسته یرسن کؤمگه چایلاری ، دریانی چاغیر

 

 

عشق دیر هیجردیر عالمده ویصالدور معنا

وارسا شوبهه ن بونا ، ایثباتینا دونیانی چاغیر

 

 

سنی غملر دنیزی بوغماغا ایلرسه هجوم

ئوزگه بیر کیمسه نی یوخ،اوندا سلیمانی چاغیر

کونلوم سنی ایستر

کونلوم ینه مین شوق ایله جانان سنی ایستر

آند اولسون عزیزجانینا کی " جان سنی ایستر

 

چکمز اتگیندن الینی  چکسه ده هجــران

ائیلر جانینی جانانا  قربان سنی ایستر

 

الهام آلیرام اینجه سسیندن  نفسیندن

تک من دئیرم   شانلی بو دوران سنی ایستر

 

فیکریمده  خیالیمدا  آییم سان  گونشیم سن

کونلوم  گئجه گوندوز سنی  هـــرآن سنی ایستر

 

ایشدیر منه اوز ویرسه  فراغیندا کدر  غــم

کونلوم ینه ده دردینه درمــان سنی ایســـتر

 

گون کچسه  زمان کچسه  وفاسیز بئله اولسان

اولکی محـــبتله  سلیمان سنی ایســــتر