آختارديم ، آراشديم ، بو گؤزل جانلار ايچينده

سئوديم سني جانيم كيمي، جانانلار ايچينده

پيمان دوز،ايلقاري بوتون ، قلبي صفالي

بخت اولدوزوسان دوغروسو ، نسوانلار ايچينده

كافر دئسه لر آديما عشقينده، غميم يوخ

قوي كافر اولوم  ،بعضي مسلمانلار ايچينده

عؤمرو باشا وئرديم بو ساياق، آز منه سؤيله:

اولماز ياشاماق ساده دل انسانلار ايچينده

مردانه داياننام ، باشيمي اگمه-رم  اؤلسم

انسان دئيلن، بير سورو، حيوانلار ايچينده

انسانليغين عالي هدفي، پاك مرامي

محو اولدو ندن ،بير پارا عنوانلار ايچينده؟

عارفلره، زاهد سؤزو بير (تنبله) دگمز

تولكو نه ائدر بير سورو ، اصلانلار ايچينده

چيخديم فلكين،هرياريشيندان، سيناغيندان

چالديم ال-آياق شوقيله آلقانلار ايچينده

طوفان قوشو تك ،حادثه لر قارشينا چيخديم

گه-رديم سينه مي نعره لي طوفانلار ايچينده

نوش ايسته ديم افسوس كي نيش اولدو نصيبيم

مين درده ايريشديم يئنه درمانلار ايچينده

بو شهرده افسانه اولوب ،شهرته چاتديم

سؤيلندي آديم (بوي)كيمي دستانلار ايچينده

آل ائتدي رقيبيم منه، آلقانه بلشديم

ياتديم اصيل اصلان كيمي، زندانلار ايچينده

زنبور ائوي تك ،اولدو اؤرك  جوريله شان-شان

ياتميش بدنيم ،ائيله كي پيكانلار ايچينده

داغلار كيمي ،چوخ فيرتينالار،آشدي باشيمدان

يانديم ،كؤله دؤندوم ، ده لي  وولقانلار ايچينده

عصيان يارادان خلقيمين اؤز اوغلو ، منم-من

باش قووزاميشام ، قورخولو طوفانلار ايچينده

دائم اوره ييم  نئي كيمي افغان ائله يير چون:

خاطر ،جمع اولانماز ،بو پريشانلار ايچينده

فرمان وئرير  عصريم كي ، وطن خصميني محم ائت

قوي قانلار آخا، بير بئله فرمانلار ايچينده

يوخسول لار آرا مهروصداقت هله واردير

بوعالي صفت لر  اؤلوب  اعيانلار ايچينده

اؤز منليگيني ساتمادي شيدا  اونا احسن

قالدي آدي، دونيا بويو ، اوغلانلار ايچينده

 

استاد يحيي شيدا