شهريار/قارانليق گئجهلر
آمان الله، ينه شيطان گليب ايمان آپارا،
قورويون، قويمويون ايمانوزو شيطان آپارا.
منيم اينسانليغيمين گؤر نه هاسان ياوادير،
كي گونوز قولي-بييابان گلير اينسان آپارا.
چؤرك آلميش الينه، آج نئجه تاقت گتيسين؟
ائله بيل ياز گئجهسي قيز گليب اوغلان آپارا.
قانلي ديرناقلاريلان اينگيليس ال قاتدي بيزه،
باخيسان راس دا آرازدان كئچير ايران آپارا.
قم آشيب-داشدي داها، خلقيله شوخلوق ائلهمز،
سئل گرك ائل داغيدا، ائو ييخا، ائيوان آپارا.
خرمني ساققيزا وئرديك، نه يامان چرچيدي بو؟
هئي گلير كنده، بيزه درد وئره، درمان آپارا.
بو قارانليق گئجهلرده قاپيميز پيس دؤيولور،
نه بيليم، بلكه عجلدير، دايانيب جان آپارا.
آناما سؤيلهيين: اوغلو ييخيليب سنگرده،
"تئللرين باس ياراما، قويما مني قان آپارا”.
آرادان بير ده بيزي بؤلسهلر اربابلاريميز،
قورخورام قويمييالار تبريزي تهران آپارا.
قارا طوفان كي، دخي خلقه شولوخلوق ائلهمز،
سئل گرك ائل داغيدا، ائو ييخا، ائيوان آپارا.
سليقهلي اوغرو ويلايتده چوخالميش اولسا،
شهرياردان دا گرك بير دولو ديوان آپارا.
شهــريار
بیرعده سئوه ر جهاندا سئیر چمنی